काठमाडौं । उदयपुर, रौतामाई गाउँपालिका–४ बस्ने ५० वर्षीय बम बहादुर मगरको ३ वटा घरमा विद्युत सर्ट भई साँझ आगलागी हुँदा ३ तोला सुन, ५ तोला चाँदी, घरभित्र रहेको अन्नपात, लत्ताकपडा, भाडावर्तन गरी करिब १४ लाख ५३ हजार रुपैयाँ बराबरको धनमाल जलेर नष्ट भएको छ । खोटाङ, दिक्तेल रुपाकोट मझुवागढी नगरपालिका–८ लामि डाडा बस्ने बम बहादुर खत्रीको घर, भान्छाघर र गोठमा राति आगलागी हुँदा नगद, भान्छाघर, गोठ, घरभित्र रहेको अन्नपात, भाडावर्तन लगायतका सरसमान गरी करिब १० लाख ६८ हजार रुपैयाँ बराबरको धनमाल जलेर नष्ट भएको छ । दोलखा, कालिञ्चोक गाउँपालिका–९ कटुवाचौर बस्ने रूद्र बहादुर थामीको घरमा दिउँसो आगलागी भई उक्त आगो फैलिएर रूद्र बहादुर थामी समेत ९ जनाको घर पूर्ण रूपमा जलेर नष्ट भएको छ । आगलागीबाट भएको क्षतिको विवरण हाल खुलेको छैन । त्यसैगरी सूर्यबिनायक नगरपालिका–६ चुनदेबी हाईटस्थित सिन्धुपाल्चोक जुगल गाउँपालिका–६ घर भएका ३७ वर्षीय छिरिङ तामाङको खाजाघरमा जुवातास खेलिरहेको अवस्थामा तामाङ समेत ९ जनालाई राति प्रहरीले पक्राउ गरेको छ । उक्त खाजाघरमा जुवातास खेलिरहेको भन्ने सूचनाको आधारमा प्रहरी वृत्त जगातीबाट खटिएको प्रहरीले उनीहरूलाई नगद १६ हजार ७५ रूपैयाँ र १ बुक तास सहित फेला पारी पक्राउ गरेको हो ।
