काठमाडौँ । सर्वोच्च अदालतले जन्मकैदको सजाय पाएका रिगल भनिने योगराज ढकाललाई आममाफी दिने निणर्य बदर हुने आदेश दिएको छ । सर्वोच्चका वरिष्ठतम न्यायाधीश ईश्वरप्रसाद खतिवडा, सपना प्रधान मल्ल र कुमार चुडालको इजलासले दुवै तर्फको बहस सुनिसकेपछि सो निणर्य सुनाएको हो । साथै इजलासले रिगललाई पुन ःपक्राउ गरी कारागार चलान गर्न पनि परमादेस दिएको छ । सर्वोच्चको निणर्य र आदेशलगत्तै उनी बाँकेबाट पक्राउ परेका छन् । संविधान दिवसको अवसरमा मन्त्रिपरिषद्को सिफारिसमा कैद माफी पाएपछि गत भदौ ४ मा रिहा भएका उनी पुनः पक्राउ परेका हुन् । बाँके नेपालगन्जका चेतन मानन्धरको हत्यामा दोषी ठहर भई कैद भुक्तान गरिरहेका रिगल माफी पाएर रिहा भएपछि सरकारको चौतर्फी आलोचना भइरहेका बेला सर्वोच्चले उनलाई माफी दिने सरकारको निणर्य बदर गरिदिएको हो । त्यसैगरी नेकपा (माओवादी केन्द्र)का उपमहासचिव वर्षमान पुनले शान्तिप्रक्रियाको बाँकी कामका लागि अन्तर्राष्ट्रिय सहयोग प्राप्त हुनेमा विश्वास व्यक्त गरेका छन् । प्रतिनिधिसभाको बैठकको विशेष समयमा उनले सङ्क्रमणकालीन विधेयक संसदको कानुन तथा मानव अधिकार समितिमा छलफलमा रहेको जानकारी दिँदै विधेयक राष्ट्रिय सहमतिबाट पारित हुने बताएका छन् । आफूले नेतृत्व गर्दा राम्रो तर अरुले नेतृत्व गर्दा नराम्रो जस्तो गरी दृष्टिकोण आउने गरेको उल्लेख गर्दै तर यस्तो विषय राष्ट्रिय प्राथमिकतामा पर्न जरुरी रहेको बताएका छन् । सदनको कार्यकालको समीक्षा गर्दा संसद्ले केही प्रयत्न गरेको उल्लेख गर्दै उनले यस अवधिमा कानुन निर्माण क्रममा मिटरब्याजसम्बन्धी महत्वपूणर् कानुन बनाएको अवगत गराएका छन् । समितिमा विभिन्न २२ वटा विधेयक छलफल भइरहेको बताउँदै उनले संसद्लाई प्रभावकारी बनाउन सबैको भूमिका आवश्यक पर्नेमा जोड दिएका छन् । त्यसैगरी नेकपा एकीकृत समाजवादीका अध्यक्ष माधवकुमार नेपालले वंशको शासनलाई अगाडि सारेर देशको समस्या समाधान गर्ने कल्पना पनि नगर्न सुझाव दिएका छन् । प्रतिनिधिसभाको बैठकमा अध्यक्ष नेपालले अँध्यारो युगमा नेपाललाई फर्काउने कुरा नसोच्न र वंशको शासनलाई अगाडि सारेर देशको समस्या समाधान होला भन्ने कल्पना नगर्न सुझाव दिएका छन् । उनले देश सञ्चालन गर्ने कुरामा प्रधानमन्त्री भएको ठाउँमा रहेका व्यक्तिहरू र मन्त्रिमण्डलले राम्ररी काम नगरेको पीडा भएमा विकल्प दिएर जनतामा आशा जगाउनुपर्ने बताएका छन् । अहिले सरकारलाई मात्रै दोष दिएर नहुने भन्दै अध्यक्ष नेपालले प्रतिपक्षले पनि आफू भित्रको कमजोरी मूल्यांकन गर्नुपर्नेमा जोड दिएका छन् ।
