काठमाडौं । प्रधानमन्त्री पुष्पकमल दाहालले मिटरब्याज पीडितहरुको समस्या समाधान अदालती प्रक्रियाबाट गर्नुपर्ने भएकाले सरकारले अदालतसँग समन्वय गरिरहेको बताएका छन् । राष्ट्रिय सरोकार तथा समन्वय समितिको बैठकमा बोल्दै प्रधानमन्त्री दाहालले मिटरब्याज पीडितहरुको समस्या समाधान अदालती प्रक्रियाबाट गर्नुपर्ने बताएका हुन् । उनले मिटरब्याज पीडित, लघुवित्त पीडित तथा सहकारी पीडितहरुसँग वार्ता भइरहेको पनि जानकारी दिएका छन् । प्रधानमन्त्री दाहालले मिटरब्याज पीडितको समस्या समाधान गर्न सरकार गम्भिर रहेको बताइएको छ । त्यस्तै नेकपा एमालेले संसद् भवन प्रवेश गरेर आन्दोलन गर्ने मिटरव्याज-लघुवित्त पीडितहरूलाई बिना सर्त रिहाई गर्न सरकारसँग माग गरेको छ । एमाले संसदीय दलले उपप्रधान एवं गृहमन्त्री नारायणकाजी श्रेष्ठसँग छलफल गर्दै सरकारको सुरक्षा कमजोरीका कारण मिटरव्याज-लघुवित्त पीडितहरू संसद भवन प्रवेश गरको भन्दै उनीहरूलाई बिना सर्त रिहाई गर्दै मुद्दा नचलाउन माग गरेको हो । ४८ जना महिला र एक जना पुरुष आन्दोलनकारीलाई प्रहरीले पक्राउ गरी मुद्दा चलाउने तयारी गरेको छ । त्यस्तै एमालेले सुरक्षा कमजोरी गर्नेलाई कारबाही गर्न माग गरेको छ भने मिटरव्याज-लघुवित्त पीडितको माग सम्बोधन गर्ने सुनिश्चितता गर्नसमेत माग गरिएको एमाले सचेतक महेश बर्तौलाले जानकारी दिएका छन् । त्यस्तै बानेश्वर र सिंहदरबार वरिपरि सर्वसाधारणलाई हिंड्नसमेत रोक लगाएर तारवार लगाएको भन्दै यस्तो काम बन्द गर्न माग गरेको उनले बताएका छन् । जवाफमा गृहमन्त्रीले मिटरव्याज-लघुवित्त पीडितहरूको बिना सर्त रिहाई र मुद्दा नचलाउने गरी सहजीकरण गर्ने र मिटरव्याज-लघुवित्त पिडितको माग सम्बोधन हुनेगरी वार्तामा भूमिका निर्वाह गर्ने प्रतिवद्धता जनाएको बर्तौलाले बताएका छन् । यसैबीच माइतीघरको निषेधाज्ञा तोड्न भन्दै अगाडि बढेको भीड र प्रहरीबीच भद्रकालीमा झडप भएको छ । माइतीघरतर्फ अगाडि बढेको भीडलाई प्रहरीले रोक्ने प्रयास गरेको थियो । सो क्रममा प्रहरी र प्रदर्शनकारीबीच झडप भएको हो । झडपका क्रममा नेता राजेन्द्र महतोसहित केही प्रदर्शनकारीहरु घाइते भएका छन् । प्रहरीले धरपकड गर्दा नेता महतो केही समय बेहोस् भएका थिए । सरकारले गत मंसिर ५ गतेदेखि माइतीघर क्षेत्रमा निषेधाज्ञा लगाएको थियो । नेता महतोले लोकतान्त्रिक समाजवादी पार्टी (लोसपा) छाडेर ‘राष्ट्रिय मुक्ति क्रान्ति’ नाम दिएर अभियान सुरु गरेका थिए । उनको क्रान्तिको पूर्व निर्धारित कार्यक्रम अन्तर्गत माइतीघरको निषेधाज्ञा तोड्ने कार्यतालिका थियो ।
