काठमाडौं । नेपाली कांग्रेसका सभापति शेरबहादुर देउवाले पार्टीका सांसदहरूलाई संसदमा एक ढिक्का भएर एउटै स्वर र एउटै धारणा प्रस्तुत गर्न निर्देशन दिएका छन् । सिंहदरबारस्थित पार्टीको संसदीय दलको कार्यालयमा बसेको पदाधिकारी, पूर्वपदाधिकारी, सांसद र पार्टीबाट सरकारमा सहभागी मन्त्रीहरूको बैठकमा सभापति देउवाले यस्तो निर्देशन दिएका हुन् । बैठकमा देउवाले कुनै असन्तुष्टि भए पार्टीको बैठकमा राख्न र संसदभित्र तथा बाहिर व्यक्तिगत धारणा होइन, पार्टीको आधिकारिक धारणा प्रस्तुत गर्न आग्रह गरेका छन् । बैठकपछि सञ्चारकर्मीहरूसँग कुरा गर्दै कांग्रेसका प्रमुख सचेतक श्याम घिमिरेले सभापति देउवाले संसदमा पार्टी एकढिक्का भएर प्रस्तुत हुनुपर्नेमा जोड दिएको बताएका छन् । बैठकमा वर्तमान सरकारको अवस्था, सरकारले गरिरहेका काम, संसदमा प्रस्तुत भएका विधेयक, अध्यादेश, र आउँदा विधेयकहरूबारे गहन छलफल भएको थियो । सरकारमा सहभागी कांग्रेसका मन्त्रीहरूले सरकारले चालिरहेका कदम र आर्थिक गतिविधि चलायमान बनाउन ल्याइएको अध्यादेशबारे जानकारी गराएका थिए । प्रमुख सचेतक घिमिरेका अनुसार मुलुकको आर्थिक पक्षमा सुधार आवश्यक भएकाले केही विधेयक संशोधन गरेर आर्थिक गतिविधि अघि बढाउन अध्यादेशमार्फत प्रक्रिया अघि बढाइएको बताइएको छ । यसैबीच उपप्रधानमन्त्री एवम् शहरी विकास मन्त्री प्रकाशमान सिंहले अतिक्रमित सार्वजनिक जग्गा सरकारले फिर्ता ल्याउने बताउनुभएको छ । बुद्धनगर टोल सुधार समितिले आयोजना गरेको कार्यक्रममा बोल्दै उहाँले सरकारले सार्वजनिक जग्गा अतिक्रमण हुन नदिने र भएका पनि फिर्ता ल्याउने बताएका हुन् । सर्वोच्च अदालतको फैसलापछि बागमतिसहित उपत्यकाका नदि किनारमा २० मिटरको मापदण्डका कारण १५/१६ लाख नागरिक समस्यामा पर्ने देखिएपछि शहरी विकास मन्त्रालयका सहसचिवको नेतृत्वमा बनेको समितिको प्रतिवेदनका आधारमा सरकार पुनरावलोकनको माग गर्दै अदालत गएको र सोही कारण अहिले तत्कालका लागि समस्या टरेको पनि उहाँले स्मरण गराउनुभएको छ । त्यस्तै उपप्रधानमन्त्री सिंहले माघ १८ बाट शुरू हुने हिउँदे अधिवेशनमा विधेयकहरूलाई पारित गरि आवश्यक नयाँ कानून बनाउने कुरालाई सरकारले उच्च प्राथमिकतामा राखेको बताउनुभएको छ । काठमाडौं १ बाट आफू निर्वाचित हुनुअघि र पछि धेरै सुधार भएको सिंहले दाबी गरेका छन् । त्यसैगरी नेकपा एमालेका महासचिव शंकर पोखरेलले नयाँ पुस्तालाई राजनीतिसँग जोड्न नसक्ने राजनीतिक दलले देशको लागि काम गर्न नसक्ने ठोकुवा गरेका छन् । राष्ट्रिय युवा संघ नेपालले आयोजना गरेको राष्ट्रिय भेलालाई सम्बोधन गर्दै पोखरेलले नेकपा एमाले युवामा भरोसा गर्ने र युवालाई अवसर दिने पार्टी भएको स्पष्ट पारेका हुन् । एमाले पार्टीको नीति एमालेको मात्र नीति बनेर देश अघि नबढ्ने उनले बताएका छन् । एमालेको नीति मुलुकको नीति बन्नु पर्ने पोखरेलले स्पष्ट परेका छन् । त्यसका लागि एमालेको नीति मिसन २०८४ र एमालेको एकल बहुमतको सरकार भएको पोखरेलले बताएका छन् । महासचिव पोखरेलले अहिलेको सरकार अप्राकृतिक भनि भ्रम फिँजाउने काम भइरहेकोप्रति आक्रोश व्यक्त गरेका छन् । लोकतन्त्रमा जनताले पत्याएका दलले शासन गर्नु पर्ने र ती दलले शासन गर्ने कुरा प्राकृतिक भएको उनको भनाई छ ।
