काठमाडौं । सिस्ने गाउँपालिका–४ दादिङ बस्ने मन्जित बुढाको घरमा दिउँसो आगलागी हुँदा घर पूर्णरूपमा जलेर करिब ३ लाख ५० हजार रूपैयाँ बराबरको धनमाल नष्ट भएको छ । प्रहरीले स्थानीय बासिन्दाको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ । यसैबीच वीरगंज महानगरपालिका–१२ फुलवारी टोल बस्ने ४३ वर्षीय प्रदिप श्रेष्ठको घरमा करेन्ट सर्ट भई बिहान आगलागी हुँदा सिलाई मेसिन, फर्निचर, लत्ताकपडा लगायतका सामान जलेर करिब ५ लाख रूपैयाँ बराबरको धनमाल नष्ट भएको छ । यसैबीच ठगी सम्बन्धी मुद्दाका फरार प्रतिवादी मकवानपुर थाहा नगरपालिका–८ घर भई ललितपुर, ललितपुर महानगरपालिका– २ सानेपा बस्ने ३५ वर्षीय चित्र बहादुर घलानलाई दिउँसो प्रहरीले पक्राउ गरेको छ । जिल्ला अदालत मकवानपुरबाट गत मंसिर १३ गते पक्राउ अनुमति जारी भई फरार रहेका उनलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले ललितपुर सानेपाबाट पक्राउ गरेको हो ।
