काठमाडौँ । परराष्ट्रमन्त्री डा. आरजु राणा देउवाले भारतको ओडिसास्थित केआईआईटी विश्वविद्यालयमा नेपाली विद्यार्थी प्रकृति लम्सालको मृत्यु र त्यसपछि विकसित घटनाक्रमबारे ओडिशाका मुख्यमन्त्री मोहन चरण माझीसँग फोनमा कुराकानी गरेकी छन् । मन्त्री राणाले लम्सालको मृत्युको निष्पक्ष अनुसन्धान र दोषीमाथि कानुनी कारबाहीका साथै त्यहाँ अध्ययनरत नेपाली विद्यार्थीहरुको सुरक्षित वातावरणमा पठनपाठनको व्यवस्थाका लागि आग्रह गरेको बताएकी छन् । नेपाली विद्यार्थीमाथि दुर्व्यवहार गर्ने शिक्षक तथा कर्मचारीलाई कलेजले बर्खास्त गरेकोमा उनीहरुलाई अस्थायी नभएर स्थायी रुपमा नै हटाउन ओडिसा सरकारले नै पहल गरिदिनका लागि आग्रह गरेको बताएकी छन् । यस विषयमा छानिबिं गर्न कलेजको पनि समिति बनेको र त्यहाँ नेपाली राजदूताबास नयाँ दिल्लीबाट कूटनीतिक कर्मचारी खटिरहेकोले समन्वयका लागि मुख्यमन्त्री माझीसँग आग्रह गरेको उनले बताएकी छन् । उनले यस घटनालाई ओडीसा राज्यले नै गम्भीर रुपमा लिएको र प्रकृतिलाई न्याय र दोषीमाथि कारबाहीका लागि उच्चस्तरीय छानबीन समिति गठन गरेर काम सुरु गरिएको जानकारी आफुलाई मुख्यमन्त्रीले गराएको उल्लेख गरेकी छन् । यसैबीच नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकारप्रति जनताको आक्रोश बढ्दै गएको बताएका छन् । काठमाडौंमा माओवादी केन्द्र केन्द्रीय कार्यालयले आयोजना गरेको स्थानीय तहबाट समाजवादको पूर्वाधार निर्माणसम्बन्धी अभिमुखीकरणको उद्घाटन गर्दै प्रचण्डले सरकारको काम दिनप्रति दिन नराम्रो हुँदै गएको र जनतामा सरकारप्रति असन्तुष्टि र आक्रोश बढ्दै गएको बताएका छन् । सरकारप्रतिको आक्रोशलाई विभिन्न राजनीतिक प्रवृत्तिहरूले आ–आफ्नो हिसाबले प्रयोग गर्ने कोसिस पनि गरिरहेको उनले बताएका छन् । प्रचण्डले देशको परिस्थितिलाई नयाँ मोड दिने उद्देश्यका साथ आफ्नो नेतृत्वको सरकारले महत्वपूर्ण रेकर्ड बनाएको अवस्थामा देशलाई भ्रष्टाचारमा फसाउँदै आएकाहरूको कारणले सरकारबाट बाहिर आउने अवस्था पैदा भएको जिकिर गरेका छन् । प्रचण्डले पार्टी अब आफ्नै वर्गमा फर्केर स्थानीय तहबाट समाजवादको अभ्यास गर्ने अभियानमा अघि बढेको बताएका छन् । अध्यक्ष प्रचण्डले अब माओवादी केन्द्रले नेतृत्व गरेका सबै पालिका नमुना बन्नुपर्ने र टाढैबाट फरक छन् भनेर चिनिने बनाउनुपर्ने बताएका छन् । त्यसैगरी नेकपा माओवादी केन्द्रकी उपाध्यक्ष पम्फा भुसालले पार्टीको सिट संख्या कम भए पनि नेपालको राजनीतिक परिप्रेक्ष्यमा यसको भूमिका महत्वपूर्ण रहेको बताएकी छन् । सन्धिखर्कमा प्रेस सेन्टरले आयोजना गरेको पत्रकार सम्मेलनमा बोल्दै पूर्वमन्त्रीसमेत रहेकी भुसालले माओवादी शक्ति संख्यात्मक रूपमा कम देखिए पनि प्रभावका हिसाबले बलियो रहेको दाबी गरिन् । उनले सत्तामा हुँदा लोकप्रिय कामहरू गरेको र प्रतिपक्षमा पनि सशक्त भूमिका निभाइरहेको दाबी गरिन् । भुसालले ठूला दलका ठूला नेताहरू भ्रष्टाचारमा फस्ने अवस्था सिर्जना भएपछि पहिलो र दोस्रो ठूलो दल मिलेर सरकार बनाएको आरोप लगाइन् । सरकारले नीति नै बनाएर भ्रष्टाचार संस्थागत गर्ने प्रयास गरिरहेको आरोप लगाउँदै उनले हालै ल्याइएको अध्यादेशमा बदनियत रहेको बताइन् । उनले माओवादी विगतका केही गलत निर्णयहरूकै कारण कमजोर हुन पुगेको स्वीकार गर्दै निर्वाचनमा कांग्रेस र एमालेसँग पालैपालो गठबन्धन गर्दा पार्टीलाई क्षति पुगेको बताइन् ।
