काठमाडौं । प्रधानमन्त्री केपी शर्मा ओलीले जनताको जरासम्म फैलिएको पार्टी भएकाले एमालेलाई कसैले हल्लाउन नसक्ने बताएका छन् । सिरहा जिल्लाको ११औं अधिवेशनलाई सम्बोधन गर्दै उनले देश र जनताको हितबाहेक एमालेसँग अरु कुनै स्वार्थ नभएकाले देश जोगाउने पार्टी एमाले भएकाले भुलभुलैयामा नलाग्न आग्रह गरेका छन् । प्रधानमन्त्री ओलीले राजतन्त्र फर्कन्छ भन्ने कसैको सपना पूरा नहुने स्पष्ट पारेका छन् । चैत १५ गतेको अराजक गतिविधिबाट राजतन्त्र पक्षधरको वास्तविकता देखिसकिएकाले आगजनी र तोडफोड गर्ने मान्छेहरूका हातमा शासन नजाने र दिन नहुने उनको भनाइ छ । उनले वर्तमान सरकार चुनावसम्म टसमस नहुने पनि दाबी गरेका छन् । त्यसैगरी नेकपा एमालेका महासचिव शंकर पोखरेलले देशको विकासका लागि ठुला दलहरु मिलेर सरकार बनेको बताएका छन् । वीरेन्द्रनगरमा आयोजना गरेको जागरण सभामा माओवादीप्रति लक्षित गर्दै नेता पोखरेलले साना पार्टीले ठूला पार्टीमाथि शासन गर्न खोज्न थालेपछि मुलुकको विकास अगाडी बढ्न नसक्ने निष्कर्षका साथ ठूला पार्टीको सरकार बनेको बताएका हुन् । माओवादी कहिले कांग्रेसको काख चढेको छ कहिले एमालेको काख चढेर ५ वर्षसम्म सत्ता चलाउँला झैँ गरेपछि ठुला दल एक भएको नेता पोखरेलले बताएका छन् । नेता पोखरेलले विकास खाने होइन गर्ने हो त्यसका लागि कर्णालीको सरकारमा एमाले आएको बताएका छन. । मण्डलेको शासनमा जनताले धेरै दुःख पाएको तर, गणतन्त्र आएपछि दुरदराजसम्म विकास पुगेको उनले बताएका छन् । एमालेको नेतृत्वमा निरन्तर बलियो सरकार भइरहे मुलुकको काँचुली फेर्ने उनले उद्घोष गरेका छन् । यसैबीच राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले हालका प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई २५ वर्षसम्म प्रधानमन्त्री बनाए पनि देश नबन्ने बताएका छन् । सो पार्टीले काठमाडौँको बल्खुमा आयोजना गरेको खबरदारी सभालाई सम्बोधन गर्दै उनले ओली, देउवा र प्रचण्ड जति सत्तामा बस्यो उति नै देश बर्बाद हुने बताएका छन् ।
