काठमाडौं । कांग्रेस केन्द्रीय सदस्य अर्जुननरसिंह केसीले संविधान संशोधनको मुद्दा अगाडि सारेर सरकार बनाएका दलहरूले संशोधनको मुद्दालाई भाषण र नारामा मात्र सीमित राख्नु जनतासमक्ष गरेको प्रतिबद्धतामा धोका भएको बताएका छन् । पार्टी मुख्यालय सानेपामा जारी केन्द्रीय कार्यसमितिको बैठकमा लिखित १७ बुँदे धारणा प्रस्तुत गर्दै केसीले सो विचार व्यक्त गरेका हुन् । केन्द्रीय समिति बैठकमा बोल्दै नेता केसीले जनतामा व्याप्त निराशा र जनआक्रोशको प्रमुख कारण भ्रष्टाचार, दण्डहीनता, कुशासन र आर्थिक अपराधले उब्जाएको र कांग्रेसले लाचार र मूकदर्शक भएर त्यसलाई टुलुटुलु हेरिरहेकाले पार्टीको साख घटेको बताएका छन् । साथै, उनले यसविरुद्ध सरकार र जनस्तरको आन्दोलन कांग्रेसकै नेतृत्व र समन्वयमा हुनुपर्नेमा पनि जोड दिएका छन् । नेता केसीले आजसम्मका चर्चित र नीतिगत भ्रष्टाचार काण्डहरूको छानबिन गर्न कुनै पूर्वप्रधानन्यायाधीशको नेतृत्वमा सर्वशक्ति सम्पन्न उच्चस्तरीय न्यायिक आयोग गठन गर्न कांग्रेसले नै पहलकदमी गर्नुपर्नेमा पनि जोड दिएका छन् । यसैबीच नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले संविधानमा भएका महत्वपूर्ण कुरालाई उल्टाउने प्रयास भइरहेको बताएका छन् । काठमाडौंमा प्रज्ञा प्रतिष्ठानद्वारा प्रकाशित दुर्गा नारायण ढकालको कृति समाजवादी दर्शनको रुपरेखा लोकार्पण गर्दै प्रचण्डले प्रतिक्रियावादीलाई अनुकूल बनाउन संविधानमा भएका महत्वपूर्ण कुरालाई उल्टाउने प्रयास भइरहेको बताएका हुन् । प्रचण्डले जनवादी प्रचार गर्दा संसदीय व्यवस्था भनेको खसीको टाउको झुन्ड्याएर कुकुरको मासु बेच्ने सिस्टम हो भनेर प्रचार गरिएको उल्लेख गर्दै अहिले संसदमा त्यस्तै देखिएको जिकिर गरेका छन् । समितिको प्रतिवेदनमा भइरहेका छेडखानीले बाहिर देखाउने एउटा र भित्र अर्कै खेल हुने गरेको पुष्टि भएको उनले बताएका छन् । प्रचण्डले आफ्नो नेतृत्वमा प्रत्येक पटक सरकार बन्दा समाजवादतर्फ देशलाई लैजान बल गरेको भन्दै बुद्धिजीवीले त्यस कुरालाई बुझ्न नसकेको आरोप लगाएका छन् । त्यसैगरी राष्ट्रिय स्वतन्त्र पार्टी (रास्वपा) ले आगामी कार्तिक २७ गते हुने रुपन्देही क्षेत्र नम्बर–३ को उपनिर्वाचनको तयारीलाई तीव्रता दिएको छ । पार्टीको सचिवालय बैठकले उपनिर्वाचनका लागि योग्य उम्मेदवार छनोट गर्ने विधिबारे विस्तृत छलफल गरेको छ भने अन्तिम कार्यविधि आगामी आइतबार टुंगो लगाउने निर्णय गरेको छ । प्रवक्ता मनिष झाले बैठकमा उम्मेदवार छनोटका लागि प्रस्तावित विधिमाथि छलफल भएको र त्यसमा आएका सुझावहरूलाई समेत समेटेर अन्तिम रूप दिइने बताएका छन् । उक्त परिमार्जित कार्यविधि अनुमोदनका लागि आइतबार बस्ने सचिवालय बैठकमा प्रस्तुत गरिने भएको छ । रास्वपाले रुपन्देही–३ मा आम नागरिक र पार्टीका शुभेच्छुकहरूको भावनालाई समेटेर पारदर्शी छनोट विधिमार्फत योग्य र सक्षम उम्मेदवार उठाउने प्रतिबद्धता जनाएको छ ।
