काठमाडौं । गृहमन्त्री सुधन गुरुङले बालबालिकालाई सानै उमेरदेखि विपद् उद्धारसम्बन्धी कुराहरु सिकाउनुपर्ने बताएका छन् । सशस्त्र प्रहरी बलका महानिरीक्षक राजु अर्यालसँग भएको छलफलमा मन्त्री गुरुङले जीवनोपयोगी सीप विकास गराउने उद्देश्यले विद्यालय पाठ्यक्रममै विपद् उद्धारसम्बन्धी कार्यक्रम समावेश गर्नका लागि पहल गर्न निर्देशन दिएका हुन् । मन्त्री गुरुङले शिक्षा, विज्ञान तथा प्रविधि मन्त्रालयसँग समन्वय गरी उक्त कार्यक्रम कार्यान्वयन गर्ने योजना ल्याउनुपर्ने बताएका छन् । बालबालिकालाई प्राकृतिक विपद्का समयमा सुरक्षित रहने तरिका, प्राथमिक उद्धार सीप तथा सचेतनामूलक ज्ञान प्रदान गर्ने लक्ष्य मन्त्री गुरुङको रहेको छ । यस कार्यक्रममार्फत विद्यार्थीलाई व्यवहारिक ज्ञानसहित आपतकालीन अवस्थाको सामना गर्न सक्षम बनाउने अपेक्षा गरिएको छ । सम्बन्धित निकायहरूबीच आवश्यक सहकार्य गरी परियोजनालाई प्रभावकारी रूपमा कार्यान्वयन गरिने मन्त्री गुरुङको सचिवालयले जनाएको छ । यसैबीच ट्रान्सपरेन्सी इन्टरनेसनल नेपालले नवगठित सरकारले भ्रष्टाचार नियन्त्रणको प्रशंसनीय सुरुवात गरेको बताएको छ । एक विज्ञप्ति जारी गर्दै ट्रान्सपरेन्सी नेपालले देशलाई सुशासनतर्फ लैजान समयसीमासहित बृहत् कार्यसूची पारित गरेकोमा प्रशंसा गरेको हो । ‘जनताको सुशासनको चाहनाअनुरूप प्रतिनिधिसभाको करिब दुईतिहाइ बहुमतसहित नवगठित सरकारले पारित गरेको शासकीय सुधारसम्बन्धी कार्यहरूको सूची जनादेशको भावना र मागअनुरूप हुनुका साथै धेरै वर्षदेखि उठाइँदै आइएका सुशासनका विषयहरू अधिकांश रूपमा समावेश भएको ठहर गर्दै ट्रान्सपरेन्सी इन्टरनेसनल नेपाल प्रशंसा गर्दछ,’ विज्ञप्तिमा भनिएको छ । पहिलो बैठकमै उक्त कार्यसूची पारित गर्नुले नयाँ सरकारले जनताको हित र सुशासनप्रति प्रतिबद्धता देखाएको ट्रान्सपरेन्सीले जनाएको छ । ‘बृहत् कार्यसूचीमा उल्लेखित कार्यहरूको कार्यान्वयनको सुरुवात भइसक्नु सराहनीय छ । तोकिएको समयसीमाभित्र सबै कार्यहरू सम्पन्न हुनेछन् भन्नेमा आशा र विश्वास लिएका छौँ,’ ट्रान्सपरेन्सी नेपालले भनेको छ । त्यसैगरी नेपाली कांग्रेसले फागुन २१ को निर्वाचनमा सहभागी १ सय ६५ क्षेत्रकै उम्मेदवारसँग चुनावी समीक्षा गर्ने भएको छ । कांग्रेसको चैत १० र ११ गतेको केन्द्रीय समितिको वैठकको निर्णय अनुसार ‘निर्वाचन समीक्षा र कांग्रेसको अबको बाटो’ सन्दर्भमा सात वटै प्रदेशमा कांग्रेसको तर्फबाट उम्मेदवार बनेका नेताहरुसँग समीक्षात्मक छलफल गर्ने भएको हो । जसका लागि प्रदेशगत रुपमा छलफलको मिति तोक्दै संयोजक समेत तोकिने भएको छ । छलफल कार्यक्रम तोकिएका संयोजकको समन्वयमा सम्बन्धित प्रदेश अन्तर्गत रहने केन्द्रीय कार्यसमितिका सदस्यहरु, प्रदेश कार्यसमितिका पदाधिकारीहरु, जिल्ला सभापतिहरु, प्रतिनिधि सभा क्षेत्रीय सभापतिहरु, प्रदेश सभा सदस्यहरु, प्रदेश सभा क्षेत्रीय सभापतिहरु र प्रतिनिधि सभाका प्रत्यक्ष तथा समानुपातिकतर्फका उम्मेदवारहरुको उपस्थितिमा सम्बन्धित जिल्ला कार्यसमितिले कार्यक्रम व्यवस्थापन गर्ने जनाइएको छ ।
