काठमाडौं । शंकर ग्रुपका अध्यक्ष शंकरलाल अग्रवाल पक्राउ परेका छन् । प्रहरीको केन्द्रीय अनुसन्धान ब्युरो(सिआइबी)ले उनलाई बुधबार डिल्लीबजारबाट पक्राउ गरेको हो । बैंकिङ कसुर मुद्दामा उनलाई पक्राउ गरिएको सिआइबीका प्रवक्ता अनुपमशमशेर जबराले बताएका छन् । विभिन्न बैंकबाट लिएको कर्जा दुरुपयोगको अभियोगमा गत महिना उनीविरुद्ध पाटन उच्च अदालतमा मुद्दा दायर भएको थियो । सोही मुद्दामा फरार रहेका अग्रवाललाई प्रहरीले पक्राउ गरेको हो । उनलाई बिहीबार अदालतमा पेस गरिने एसएसपी जबराले बताएका छन् । जगदम्बा स्टिल्सको नाममा विभिन्न बैंकबाट लिइएको ४२ करोड १४ लाख रुपैयाँ दुरुपयोग गरेको अभियोगमा शंकरलाल, उनका छोराहरू साहिल र सुलभ तथा बिचौलिया दीपक भट्टविरुद्ध गत २८ जेठमा मुद्दा दायर भएको थियो । मुद्दा दायर भएको लामो समयसम्म पनि अदालतमा उपस्थित नभएपछि पक्राउ गरिएको सिआइबीका एक अधिकारीले बताएका छन् । यसैबीच सरकारले मुगुको सोरु गाउँपालिका–१ का गणेश नेपालीको मृत्यु प्रकरणमा छानबिन गर्न न्यायिक समिति गठन गरेको छ । प्रधानमन्त्री तथा मन्त्रिपरिषद्को कार्यालय, सिंहदरबारमा बसेको मन्त्रिपरिषद्को बैठकले उच्च अदालतका पूर्वन्यायाधीश केशवप्रसाद बास्तोलाको संयोजकत्वमा समिति गठन गरेको हो । समितिमा पूर्व–सहन्यायाधिवक्ता कृष्णमोहन कोइराला र पूर्व–सहसचिव रामुराज कडरिया सदस्य रहेका छन् । बैठकले समितिलाई अबको सात दिनभित्र घटनासम्बन्धी छानबिन गरी प्रतिवेदन पेस गर्ने जिम्मेवारी दिएको छ । त्यसैगरी नेपाली कांग्रेसका निवर्तमान कार्यवाहक सभापति पूर्णबहादुर खड्काले पार्टीभित्र संवाद, सहमति र सम्पूर्ण एकता कायम गर्नु अहिलेको सबैभन्दा ठूलो आवश्यकता भएको बताएका छन् । उनले राष्ट्रियता, प्रजातन्त्र र समाजवादका प्रवर्तक बीपी कोइरालाको राजनीतिक दर्शन वर्तमान परिस्थितिमा अझ सान्दर्भिक रहेको उल्लेख गर्दै कांग्रेसले बीपीको मार्गदर्शनलाई व्यवहारमा उतार्नुपर्नेमा जोड दिएका छन् । बीपी कोइरालाको ४४औँ स्मृति दिवसका अवसरमा आयोजित कार्यक्रममा बोल्दै खड्काले बीपीप्रति श्रद्धाञ्जली व्यक्त गर्दै कांग्रेसभित्रको आन्तरिक मतभेद संवादबाट समाधान गर्नुपर्ने धारणा राखेका छन् । उनले पार्टीको एकता केवल व्यक्तिहरूलाई जोडेर सम्भव नहुने, विचार र सहमतिमा आधारित हुनुपर्ने बताएका छन् । खड्काले २०३३ सालको भन्दा अहिले नेपालको राष्ट्रियता झनै जटिल अवस्थामा पुगेको दाबी गर्दै देशको अस्तित्वसमेत चुनौतीपूर्ण मोडमा रहेको टिप्पणी गरेका छन् । यस्तो अवस्थामा कांग्रेसभित्रको बलियो एकताले मात्रै राष्ट्रिय राजनीतिक नेतृत्व गर्न सक्ने उनको भनाइ थियो । खड्काले बीपी कोइरालाले आफ्नो सम्पूर्ण राजनीतिक जीवनभर संवाद, सहमति र राष्ट्रिय मेलमिलापको मार्ग अपनाएको स्मरण गरेका छन् । पार्टीभित्र, राजनीतिक दलहरूबीच र राष्ट्रवादी शक्तिहरूबीच सहकार्य आवश्यक रहेको सन्देश बीपीले जीवनको अन्तिम समयसम्म दिइरहेको उनले उल्लेख गरेका छन् ।
