काठमाडौँ । निर्वाचन आयोगले समानुपातिक निर्वाचन प्रणाली अन्तर्गत दलहरूले बुझाएका उम्मेदवारको बन्दसूचीमाथि छानबिन प्रक्रिया थालेको छ । आयोगले प्राप्त सूचीको अध्ययन गर्दै नाम, क्लस्टर तथा समावेशी मापदण्ड मिलेको–नमिलेको जाँच गर्न सुरु गरेको हो । निर्वाचन आयोगका सहसचिव तथा प्रवक्ता नारायणप्रसाद भट्टराईका अनुसार कानुनले तोकेको व्यवस्था अनुसार क्लस्टर मिलान, उम्मेदवारको समावेश तथा असमावेशको परीक्षण भइरहेको छ । आयोगले पुस २० गतेसम्म प्रारम्भिक अध्ययन सम्पन्न गरी सम्बन्धित दलहरूलाई पत्राचार गर्ने जनाएको छ । उनका अनुसार दलहरूले पुस २७ गतेसम्म आवश्यक संशोधन गर्न सक्नेछन् भने उम्मेदवारहरूले पुस २८ गतेसम्म आफ्नो नाम फिर्ता लिन सक्नेछन् । नाम फिर्ता लिएपछि खाली हुने स्थानमा सोही समूहका अन्य उम्मेदवारको नाम पुस ३० गतेसम्म पेश गर्नुपर्नेछ । आयोगको कार्यतालिका अनुसार माघ ४ गते उम्मेदवारको बन्दसूची प्रारम्भिक रूपमा सार्वजनिक गरिनेछ । त्यसपछि माघ ५ देखि १० गतेसम्म उम्मेदवारको योग्यता सम्बन्धी दाबी–विरोधका निवेदन दर्ता गर्न सकिनेछ । माघ ११ देखि १७ गतेसम्म आयोगले दाबी–विरोधको छानबिन गरी निर्णय गर्नेछ भने अन्तिम उम्मेदवारको बन्दसूची माघ २० गते प्रकाशन गरिनेछ । आयोगले तय गरेको तालिका अनुसार फागुन २१ गते बिहान ७ बजेदेखि साँझ ५ बजेसम्म मतदान हुनेछ । यसैबीच राष्ट्रिय स्वतन्त्र पार्टीले कमी–कमजोरी देखिए सच्याउने सहमतिमा प्रतिनिधिसभा निर्वाचनको समानुपातिक बन्दसूची पेस गरिएको जनाएको छ । अन्तिम समयको राजनीतिक संवाद र सहमतिका कारण भएको समय अभावलाई कारण देखाउँदै रास्वपा सचिवालयले जारी गरेको विज्ञप्तिमा भनिएको छ, ‘…यस प्रक्रियामा कुनै कमी–कमजोरीहरू देखिएमा सच्याउन पाइने समयको सदुपयोग गरिने कुरामा सहमत हुँदै सूची पेस भएको हो ।’ त्यसैगरी अन्तरिम सरकारका गृहमन्त्री ओमप्रकाश अर्यालले तोकिएकै मितिमा निर्वाचन हुने दाबी गरेका छन् । विराटनगरमा आयोजित कोशी प्रदेश स्तरिय सुरक्षा गोष्ठीलाई सम्बोधन गर्दै गृहमन्त्री अर्यालले तोकिएकै मितिमा निर्वाचन हुने दाबी गरेका हुन् । गृहमन्त्री आर्यालले वर्तमान सरकारको मुख्य ध्येय तोकिएकै समयमा निर्वाचन सम्पन्न गर्नु रहेकाले निर्वाचनका लागि आवश्यक वातावरण तयार पारिरहेको जानकारी दिएका छन् । अर्यालले लोकतन्त्र र सुशासनका लागि निर्वाचन अपरिहार्य रहेकाले निर्वाचनमार्फत निर्वाचित सरकारलाई जिम्मेवारी हस्तान्तरण गर्नेतर्फ सरकार केन्द्रित रहेको स्पष्ट पारेका छन् । अर्यालले निर्वाचन हुन्छ हुँदैन भन्ने दुविधामा कोही नपर्न आग्रहसमेत गरेका छन् । उनले समानुपातिक उम्मेदवारको नामावली सूचीकृत भएसँगै निर्वाचन नै सुरु भइसकेको दाबी पनि गरेका छन् । आर्यालले निर्वाचनको वातावरणका बारेमा राजनीतिक दलहरूको मुख्य चासो रहेको लुटिएका हतियार र भागेका कैदीका विषयमा सरकारले विशेष अपरेशन चलाएर नियन्त्रणमा लिने स्पष्ट पारेका छन् ।
