काठमाडौं । राष्ट्रियसभाबाट निर्वाचनसम्बन्धी दुई विधेयक पारित भएका छन् । प्रतिनिधिसभाबाट सन्देशसहित प्राप्त प्रतिनिधिसभा सदस्य निर्वाचन (पहिलो संशोधन) विधेयक, २०८३ र मतदाता नामावली (पहिलो संशोधन) विधेयक, २०८३ बहुमतले पारित भएको हो । यसअघि बैठकमा प्रधानमन्त्री एवं गृहमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले ती विधेयक पारित गरियोस् भन्ने बेग्लाबेग्लै प्रस्ताव पेस गरेकी थिइन् । यसैबीच नेपालले पनि भारतको सीमा मिचेको छ भन्ने प्रधानमन्त्री वालेन्द्र शाहको भनाइप्रति प्रमुख प्रतिपक्षी दल कांग्रेस आपत्ति जनाएको छ । संसदमा सांसदहरुको प्रश्नको जवाफ दिँदै शाहले लिपुलेक, लिम्पियाधुरासहितको सीमा विवादमा समाधानका लागि प्रयास भइरहेको जानकारी दिँदै नेपालले पनि भारतीय सीमा अतिक्रमण गरेको बताएका थिए । शाहले आफू प्रधानमन्त्री भएपछि नेपालले पनि भारतको सीमा मिचेको जानकारी पाएको बताएका हुन् । त्यसप्रति कांग्रेसकी प्रमुख सचेतक वासना थापाले आपत्ति जनाउँदै सदनलाई थप जानकारी दिन माग गरेकी हुन् । त्यसैगरी नेपाल–भारत सीमा क्षेत्रमा देखिएका विविध प्राविधिक तथा प्रशासनिक चुनौती समाधान गर्न दुवै देशका प्राविधिक संयन्त्रहरू सक्रिय रूपमा कार्यरत रहेका छन् । परराष्ट्र मन्त्रालयका अनुसार सीमास्तम्भहरूको मर्मत, दशगजा क्षेत्रको अतिक्रमणको पहिचान तथा सीमा वारपार जग्गा उपयोग (क्रस बोर्डर अकुपेसन) सम्बन्धी तथ्य संकलन गर्ने काम संयुक्त रूपमा अघि बढाइएको छ । लामो समयदेखि अवरुद्ध रहेका प्राविधिक कार्यहरू हाल पुनः तीव्र गतिमा अघि बढिरहेको मन्त्रालयले जनाएको छ । नेपाल–भारतबीचको सीमा व्यवस्थापन ऐतिहासिक सन्धि–सम्झौता र नक्साका आधारमा गरिँदै आएको उल्लेख गर्दै मन्त्रालयले सुगौली सन्धि अनुसार सीमारेखा निर्धारित भए पनि केही स्थानमा नक्साङ्कन तथा स्पष्ट सीमांकन बाँकी रहेको स्पष्ट पारेको छ । सीमावर्ती क्षेत्रका केही स्थानमा एक देशको उपयोगमा रहेको जमिन अर्को देशको भूभागमा पर्ने अवस्था देखिएको प्रारम्भिक अध्ययनले संकेत गरेको छ । यस विषयमा दुवै देशका प्राविधिक टोलीहरूले संयुक्त रूपमा विस्तृत अध्ययन र अभिलेख संकलन गरिरहेका छन् । परराष्ट्र मन्त्रालयले सीमा सम्बन्धी सबै विषयहरू कूटनीतिक माध्यम र आपसी समझदारीमार्फत समाधान गर्न नेपाल सरकार प्रतिबद्ध रहेको दोहोर्याएको छ ।
