काठमाडौं । दाङ, राजपुर गाउँपालिका–५ जंग्रहवास्थित सडकमा रा.६ प ८९२४ नम्बरको मोटरसाइकल अनियन्त्रित भई गएराति दुर्घटना हुँदा मोटरसाइकलमा सवार दंगीशरण गाउँपालिका–१ बस्ने ३४ वर्षीय तारा प्रसाद विकको मृत्यु भएको छ । दुर्घटनामा गम्भीर घाइते भएका उनको स्थानीय अस्पताल हुँदै मेडिकल कलेज कोहलपुर बाँकेमा थप उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ । सबै स्थानका दुर्घटना स्थलमा उद्धार कार्य गर्नुका साथै दुर्घटनाका सम्बन्धमा प्रहरीले आवश्यक अनुसन्धान गरिरहेको छ । यसैबीच बागलुङ, ढोरपाटन नगरपालिका–६ छ्यान्तुङ बस्ने ५० वर्षीय सव बहादुर बिक आफ्नै घरदेखि १० मिटर टाढा छिमेकीको आलुबारीमा मृत अवस्थामा फेला परेका छन् । कपिलबस्तु, शिवराज नगरपालिका–९ रमदहवा बस्ने २४ वर्षीय भिम बहादुर घर्ति मगर सोही ठाउँस्थित छिमेकीको घर बाहिर कुर्चिमा मृत अवस्थामा फेला परेका छन् । कास्की, पोखरा महानगरपालिका–१५ गस्तीघाट नजिक सेती नदीको खोचमा हाल हाल नाम, थर, वतन नखुलेका ६५ वर्षीय पुरुष मृत अवस्थामा फेला परेका छन् । त्यस्तै काठमाडौं महानगरपालिका–१६ बालाजु बोहोराटार हाईट डेरा गरी बस्ने गोरखा गण्डकी गाउँपालिका–७ घर भएका ५४ वर्षीय प्रेम बहादुर गुरुङको कोठाबाट नगद ८ हजार रूपैयाँ र सुनका विभिन्न गहनासमेत गरी करिब २ लाख ८५ हजार रूपैयाँ बराबरको धनमाल राति चोरी भएको छ । यसैबीच सप्तरी, तिरहुत गाउँपालिका–५ मैनाकडेरीस्थित सडकमा स.७ प ७७५७ नम्बरको मोटरसाइकलको ठक्करबाट साईकलयात्री सोही ठाउँ बस्ने मोहम्मद मजिदको छोरा १६ वर्षीय मोहम्मद महताजको दिउँसो मृत्यु भएको छ । ठक्करबाट गम्भीर घाइते भएका उनको प्राथमिक स्वास्थ्य केन्द्र कञ्चनपुरमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ । ओखलढुंगा, लिखु गाउँपालिका–२ दाहालटारस्थित सडकमा ना.६ त ८७४६ नम्बरको ट्याक्टर सडकबाट करिब १ सय ५० मिटर तल खसेर साँझ दुर्घटना हुँदा ट्याक्टरमा सवार लिखु गाउँपालिका–२ बस्ने १८ वर्षीया अप्सरा खड्काको मृत्यु भएको छ । दुर्घटनामा गम्भीर घाइते भएकी उनको रामेछाप, रामेछाप नगरपालिका–३ साँघुटारस्थित मेडिकलमा उपचारको क्रममा मृत्यु भएको हो ।
