नालायक सरकारले देशको अर्थतन्त्र ध्वस्त पारेको आरोप

काठमाडौं । सभामुख देवराज घिमिरेले छोटो समयमा नै संसदीय गतिविधिबाट नागरिका समस्या समाधान गरी नेपालको संसदीय इतिहासमै शिक्षा दिने किसिमको भुमिका खेल्न सांसदहरुलाई आग्रह गरेका छन् । संसद भवन नयाँ बानेश्वरमा आयोजित प्रतिनिधि सभाका सदस्यहरुको लागि दुई दिने अभिमुखीकरण कार्यक्रमलाई सम्बोधन गर्दै उनले यस्तो बताएका हुन् । उनले नागरिकका समस्यहरुको चाङ बढ्दै गइरहेकाले नागरिकका समस्याहरुलाई समाधान गर्न संसदमा आफ्नो भुमिकालाई बलियो बनाउनुपर्ने बताए । सभामुख घिमिरेले विगतमा कतिपय सांसदहरुको आचार, व्यवहारहरु जनमुखी हुन नसकेको भन्दै संसदमा आइसकेपछि जनतासँग गरेका प्रतिवद्धताहरु पूरा गर्ने हिसावबाट अघि बढ्न सुझाव दिए । उनले विगतमा संसदमा भएका राम्रा कुराबाट शिक्षा लिँदै सांसदहरुले आफ्नो संसदीय भुमिकालाई प्रभावकारी बनाउनुपर्ने बताए । उनले नागरिकले संसदका गतिविधिबाट, अभिव्यक्ति र प्रयत्नबाट सांसदहरुको काम खोजिरहेको बताए । सभामुख घिमिरेले संसदलाई प्रभावकारी बनाउने सबैभन्दा ठूलो जिम्मेवारी सरकार र प्रमुख प्रतिपक्षको हुने बताए ।    त्यसैगरी प्रधानमन्त्री पुष्पकमल दाहाल प्रचण्डले राष्ट्रिय स्वतन्त्र पार्टी सत्ता गठबन्धन कायमै रहने विश्वास व्यक्त गरेका छन् । स्थायी कमिटी बैठकमा सहभागी हुन पेरिसडाँडा पुगेका माओवादी केन्द्रका अध्यक्ष समेत रहेका प्रधानमन्त्री प्रचण्डलाई रास्वपाले समर्थन फिर्ता लिन लागेको हो भनेर सोधेका थिए । सरकारमा बस्ने या नबस्ने बारेमा राष्ट्रिय स्वतन्त्र पार्टीको केन्द्रिय समिति र संसदीय दलको बैठक चलिरहदाँ प्रधानमन्त्री प्रचण्डको यस्तो प्रतिक्रिया आएको हो ।  त्यसैगरी नेकपा एमालेका अध्यक्ष केपी शर्मा ओलीले पछिल्लो डेढ वर्ष शासन गरेको नालायक सरकारले देशको अर्थतन्त्र ध्वस्त पारेको आरोप लगाएका छन् । विराटनगरमा सुरू भएको सीएनआई कोसी एक्स्पोको उद्घाटन समारोहलाई सम्बोधन गर्दै ओलीले कांग्रेस नेतृत्वको सरकारलाई लक्षित गरी डेढ वर्ष नालायक सरकारले शासन गर्दा देशको अर्थतन्त्र नै ध्वस्त भएको आरोप लगाएका हुन् । ओलीले नयाँ सरकार गठन भएसँगै अर्थतन्त्रमा सुधार आउने क्रम सुरू भइसकेको दाबी गरे । परमादेशबाट आएको ग्रहणले डेढ वर्ष सूर्यलाई छोप्यो भन्दैमा आत्महत्या गर्न नहुने भन्दै ओलीले आत्महत्याको धेरै चर्चा पनि नगर्न आग्रह गरे । ओलीले समस्या आयो भन्दैमा आत्महत्याबारे नसोच्न, बाँचुन्जेल हिम्मत नहार्न र संघर्ष गरेर अघि बढ्न उद्योगी व्यवसायीलाई आग्रह गरे । ओलीले उद्योगी व्यवसायीको समस्या समाधान गर्न सरकार तत्पर रहेकाले आफ्ना समस्या लिएर काठमाण्डौं आउन विराटनगरका उद्योगी व्यवसायीलाई आग्रह गरे । उनले उद्योगी व्यवसायीका समस्या सरकारले समाधान गर्ने दाबी पनि गरे । सरकारले आर्थिक अवस्था फर्काउने प्रयास गरिरहेकाले कुराको जुहारी गर्ने वेला नभएको उनले बताए । उनले उद्योगी व्यवसायीहरूलाई सङ्गठनात्मक प्रतिस्पर्धा नगर्न काममा प्रतिस्पर्धा गर्न आग्रह गरे । ऋणले ऋण थप्ने भन्दै ओलीले राज्य सञ्चालनका लागि पनि ऋण लिनु पर्ने अवस्थामा देश पुगिसकेको भए पनि सरकारले अर्थतन्त्रलाई चाँडै लयमा ल्याउने प्रयत्न थालिसकेको ओलीले बताए ।