काठमाडौं । धनुषा, गणेशमान चारनाथ नगरपालिका–६ गोदार बस्ने सिङगेशवर महतोको साईकल पसल र साईकलको ट्युब, टायर स्टोर गरी राखेको कोठामा पुजाको दियोबाट आगो सल्किएर राति आगलागी हुँदा करिब ५ लाख रुपैयाँ बराबरको धनमाल जलेर नष्ट भएको छ । सुर्खेत, लेकबेशी नगरपालिका–५ तल्लो खल टाकुरा बस्ने चन्द्रकली रजालीको घरमा गएराति आगलागी हुँदा घर र घरभित्र रहेको अन्नपात, लत्ता कपडा समेत गरी करिब ३ लाख ५० हजार रुपैयाँ बराबरको धनमाल जलेर नष्ट भएको छ । पोखरा, पोखरा महानगरपालिका–६ हल्लनचोक लेकसाईडस्थित सेलवेज सपिङ सेन्टरको स्टोर कोठमा दिउँसो आगलागी भएको छ । आगलागीबाट भएको क्षतिको विवरण हाल खुलेको छैन । यसैबीच बर्दिया, गुलरिया नगरपालिका–९ खल्लिपुरुवाबाट अवैध लागूऔषध ब्राउनसुगर जस्तो देखिने धुलो पदार्थ करिब १० ग्राम सहित सोही ठाउँ बस्ने २४ वर्षीय शाह बुद्धिन सेखलाई राति प्रहरीले पक्राउ गरेको छ । इलाका प्रहरी कार्यालय मथुराहरिद्वारबाट खटिएको प्रहरीले उनलाई उक्त लागूऔषध सहित पक्राउ गरेको हो । भक्तपुर, सूर्यविनायक नगरपालिका–४ सिरुटार चारदोबाटोबाट अवैध लागूऔषध गाँजा करिब ५ सय ५५ ग्राम सहित २ जनालाई दिउँसो प्रहरीले पक्राउ गरेको छ । पक्राउ पर्नेहरुमा ललितपुर महालक्ष्मी नगरपालिका–९ लामाटार बस्ने २६ वर्षीय सुमित पौडेल र २६ वर्षीय सनम तित्तल रहेका छन् । प्रहरी वृत्त ठिमीबाट खटिएको प्रहरीले बा.९० प ८७९२ नम्बरको स्कुटर जाँच गर्ने क्रममा स्कुटरमा सवार उनीहरुलाई उक्त लागूऔषध सहित फेला पारी पक्राउ गरेको हो ।
