काठमाडौं । रौतहट, ईशनाथ नगरपालिका–६ जयनगर बस्ने शेख ईसरातको घरमा राति आगलागी भई सोही ठाउँ बस्ने मजिबुर रहमानको घरमा समेत आगलागी हुँदा उक्त आगलागीमा परी रहमानको छोरी १२ वर्षीया राजिया खातुनको घटनास्थलमै मृत्यु भएको छ । आगलागीबाट दुवै जनाको घर जलेर करिब १८ लाख रुपैयाँ बराबरको धनमाल नष्ट भएको छ । सिरहा, धनगढीमाई नगरपालिका–१२ बस्ने राम नारायण महतो समेत पाँच जनाको सिसौको बारीमा दिउँसो आगलागी हुँदा २० बिघाहमा रहेको सानो तथा ठुलो सिसौका बोट बिरुवाहरु जलेर करिब १५ लाख रुपैयाँ बराबरको धनमाल नष्ट भएको छ । नवलपरासी (पूर्व), गैंडाकोट नगरपालिका–२ भृकुटीचोकस्थित पुरानो कागज फ्याक्ट्रीमा बिहान आगलागी भएको छ । आगलागीबाट भएको क्षतिको विवरण हाल खुलेको छैन । यसैबीच मेचीनगर नगरपालिका –६ पुरानो मेचीपुलबाट अवैध लागूऔषध खैरो हेरोईन जस्तो देखिने पदार्थ ४ ग्रामसहित २ जनालाई दिउँसो प्रहरीले पक्राउ गरेको छ । पक्राउ पर्नेहरूमा शिवसताक्षी नगरपालिका–१ बस्ने २४ वर्षीय प्रजन्त राई र बाँके नेपालगञ्ज उपमहानगरपालिका–६ घर भई झापा विर्तामोड नगरपालिका–१ बस्ने २१ वर्षीय शोहन भडेल रहेका छन् । ईलाका प्रहरी कार्यालय काँकरभिट्टा र लागूऔषध नियन्त्रण ब्यूरो काँकरभिट्टाबाट खटिएको संयुक्त टोलीले भारतबाट नेपालतर्फ आउँदै गरेको मे.१० प ३८०७ नम्बरको स्कुटरलाई जाँच गर्ने क्रममा स्कुटरमा सवार उनीहरूलाई उक्त पदार्थसहित फेला पारी पक्राउ गरेको हो ।
