काठमाडौं । मोरङ, बेलबारी नगरपालिका–१० प्रगती टोलबाट नियन्त्रित लागूऔषध स्पासपेन ३ सय ८६ ट्याब्लेट, ट्रमाडोल ३ सय ५० ट्याब्लेट र अवैध लागूऔषध गाँजा ६ सय ११ ग्रामसहित कानेपोखरी गाउँपालिका–५ बस्ने २८ वर्षीय आशिस राईलाई बिहान प्रहरीले पक्राउ गरेको छ । ईलाका प्रहरी कार्यालय बेलबारी र प्रहरी चौकी डाँगिहाटबाट खटिएको प्रहरीले प्र १–०२–०४० प ९३८४ नम्बरको मोटरसाइकललाई जाँच गर्ने क्रममा मोटरसाइकल चालक राईलाई उक्त लागूऔषधसहित फेला पारी पक्राउ गरेको हो । यसैबीच ललितपुर, गोदावरी नगरपालिका–३ टौखेल बुद्धबिहार टोल डेरा गरी बस्ने ललितपुर भैंसेपाटी घर भएका ५१ वर्षीय पन्चमान तामाङ आफ्नै कोठामा मृत अवस्थामा फेला परेका छन् । धनकुटा, छथरजोरपाटी गाउँपालिका–२ तल्लो सल्ले बस्ने २१ वर्षीया सुनिता लिम्बु राना सोही ठाउँस्थित अलैची बारीमा मृत अवस्थामा फेला परेका छन् । काठमाडौं, चन्द्रागिरी नगरपालिका–२ नागढुङ्गाबाट अवैध लागूऔषध खैरो हेरोइन २ ग्राम २८ मिलिग्रामसहित बर्दिया राजापुर नगरपालिका–१ झपही बस्ने २९ वर्षीय कृष्ण चौधरीलाई बिहान प्रहरीले पक्राउ गरेको छ । प्रहरी प्रभाग नागढुङ्गाबाट खटिएको प्रहरीले बर्दियाबाट काठमाडौंतर्फ आउँदै गरेको भे.१ ख ३६७५ नम्बरको बसलाई जाँच गर्ने क्रममा बसमा सवार उनलाई उक्त खैरो हेरोइनसहित फेला पारी पक्राउ गरेको हो ।
