काठमाडौं । राष्ट्रिय स्वतन्त्र पार्टी (रास्वपा)ले ढाकाकुमारको स्थानमा विन्दबासिनी कंसाकारलाई सांसद बनाउने भएको छ । केन्द्रीय समिति बैठकले सांसद ढाकाकुमार श्रेष्ठलाई साधारण सदस्यसमेत नरहनेगरी कारबाही गर्दै विन्दबासिनी कंसाकारलाई सांसद बनाउने निर्णय गरेको हो । श्रेष्ठले व्यवसायी दुर्गा प्रसाईंसँग दुई करोड रकमको डिल गरेको अडिओ सार्वजनिक भएको थियो । अडिओ बाहिरिएपछि रास्वपाले श्रेष्ठलाई साधारण सदस्य समेत नरहनेगरी निलम्बन गरेको हो । त्यसैगरी संसदमा एकीकृत समाजवादी सांसद राजेन्द्र पाण्डे र एमालेका प्रमुख सचेतक पदम गिरीबीच सवाल जवाफ भएको छ । प्रतिनिधिसभा बैठकमा सांसद पाण्डेले नेपालीलाई नक्कली भुटानी शरणार्थी बनाएर ठगी गर्ने अपराधीलाई कारबाही गर्नुपर्ने बताएपछि एमाले प्रमुख सचेतक गिरीले आपत्ति जनाएका हुन् । ठगी घटनामा पूर्व गृहमन्त्री रामबहादुर थापा बादल र उनका सुरक्षा सल्लाहकार ईन्द्रजित राई, एमाले नेता टोपबहादुर रायमाझी र उनको छोरा सन्दीप रायमाझीको समेत नाम आएको भन्दै पाण्डेले अपराधीलाई कारबाही गर्नुपर्ने बताए । पाण्डेको उक्त अभिव्यक्तिप्रति आपत्ति जनाउँदै एमाले प्रमुख सचेतक पदम गिरीले सांसदलाई अपराधी भनेकाले रेकर्डबाट हटाउन माग गरे । यसपछि एकीकृत समाजवादीका सांसद पाण्डेले आफूले कुनै सांसद वा अरु कसैलाई नभएर अपराधीलाई कारबाही गर्नुपर्ने भनेको जवाफ दिए । त्यसैगरी नेकपा (एमाले) का अध्यक्ष एवं पूर्व प्रधानमन्त्री केपी शर्मा ओलीले नेपालले कृषि उपजमा आत्मनिर्भर हुन नसक्दा गुणस्तरहीन र विषाक्त खानेकुरा खान बाध्य हुनु परेको बताएका छन् । गृह जिल्ला झापाको शिवसताक्षीस्थित झिलझिलेमा आयोजित एक कार्यक्रममा ओलीले कृषिको व्यवसायीकरण र आत्मनिर्भरताका लागि दक्षिण एसियाली मुलुकबिच सहकार्यको आवश्यकतासमेत जोड दिए । उनले कृषि क्षेत्रको आधुनिकीकरण र व्यावसायिकताका क्षेत्रमा एमालेको सरकारले गरेका कामको बारेमा पनि चर्चा गरे । दक्षिण एसियाली किसान सम्मेलन उद्घाटन गर्न अध्यक्ष ओली भद्रपुर विमानस्थल हुँदै झापा गएका हुन् ।
