काठमाडौं । नेपाली काँग्रेसका नेता डा. शशांक कोइरालाले नेपाली काँग्रेसलाई पुनः जीवन दिनपर्ने आवश्यकता रहेको बताएका छन् । पार्टी निकट नेपाल प्रेस युनियन, काठमाडौं शाखाको नवौँ अधिवेशनलाई सम्बोधन गर्दै उनले यस्तो बताएका हुन् । उनले नेपाली काँग्रेस अहिले छियाछिया भइरहेको भन्दै यसलाई पुनः जीवन दिनुपर्ने खाँचो रहेको बताएका हुन् । नेता कोइरालाले सबैले आफ्नो दायित्व स्पष्ट गर्नुपर्ने आवश्यकता रहेको बताए । त्यसैगरी उपप्रधान एवं गृहमन्त्री नारायणकाजी श्रेष्ठले राष्ट्रिय परिचयपत्र आगामी आर्थिक वर्षबाट स्थानीय तहबाटै वितरणको व्यवस्था मिलाइने बताएका छन् । प्रतिनिधिसभामा विनियोजन विधेयक २०८० माथि गृहमन्त्रालय सम्बन्धी बजेटको छलफलमा उठेका प्रश्नको जवाफ दिने क्रममा गृहमन्त्री श्रेष्ठले राष्ट्रिय परिचयपत्र वितरण दर्ता तथा वितरणलाई अभियानको रुपमा सञ्चालन गरी आगामी आर्थिक वर्षबाट स्थानीय तहबाट वितरणको व्यवस्था गरिने बताए । उनले हाल देशभर जिल्ला प्रशासन कार्यालय र इलाका प्रशासन कार्यालयमा ३३९ दर्ता स्थानबाट वितरण र दर्ता भइरहेको जानकारी दिए । गृहमन्त्री श्रेष्ठले राष्ट्रिय परिचयपत्र छपाइ विगतमा ७ हजारको संख्यामा हुने गरेकोमा हाल त्यसको क्षमता बढाइ दोब्बर बनाइएको बताए । दैनिक १५ हजार कार्ड छपाइ भइरहेको र छपाइ भएका कार्डहरू वितरणका लागि सम्बन्धित जिल्ला प्रशासन कार्यालयमा पठाउने काम भईरहेको उनले बताए । उनले नागरिकको सुरक्षाका लागि ७७ वटै प्रशासन कार्यालयले जिम्मेवारीका साथ काम गरिरहेका बताए । त्यसैगरी नेकपा एमालेका अध्यक्ष केपी शर्मा ओलीले नेकपा विभाजनको यथार्थ विश्लेषण गर्नुपर्ने बताएका छन् । केशवप्रसाद बडालद्वारा लिखित पुस्तक सिंहावलोकनको लोकर्पण गर्दै उनले यस्तो बताएका हुन् । उनले नेकपा विभजन भयो भनेर मात्रै अब नबुझ्ने भन्दै विभाजनका कारणहरुको यथार्थ विश्लेषण गर्ने हो भने भविष्यलाई राम्रो हुने जिकिर गरे । उनले पार्टी किन विभाजनसम्म पुग्यो ? कस्तो पृष्ठभूमिबाट विभाजनसम्म पुग्यो ? भन्नेकुराको यथार्थ नागरिकले थाहा पाउनुपर्ने आवश्यकता रहेको बताए । उनले नेकपा विभाजन हुनुको कारण स्वचालित थियो वा परिचालित के थियो ? त्यसको विश्लेषण जरुरी रहेको बताए ।
