काठमाडौं । राष्ट्रपति रामचन्द्र पौडेलसमक्ष सर्वोच्च अदालतको आर्थिक वर्ष २०७८/७९ को प्रतिवेदन पेश गरिएको छ । शीतल निवासस्थित राष्ट्रपति कार्यालयमा आयोजित एक समारोहमा राष्ट्रपति पौडेलसमक्ष प्रधानन्यायाधीश हरिकृष्ण कार्कीले सो प्रतिवेदन पेश गर्नुभएको हो । नेपालको संविधानको धारा १३८ बमोजिम सर्वोच्च अदालत, न्याय परिषद् र न्याय सेवा आयोगको वार्षिक प्रतिवेदन राष्ट्रपति समक्ष पेश गर्नुपर्ने संवैधानिक व्यवस्था रहेको छ । त्यसैगरी नेकपा (एमाले) का सांसद गोकुलप्रसाद बाँस्कोटाले देश भरी गुठीसँग सम्बन्धी जग्गाहरूमा समस्या रहेको भन्दै समस्या समाधानका लागि माग गरेका छन् । प्रतिनिधि सभा बैठकको आकस्मिक समयमा बोल्दै उनले वर्षौँदेखि जमिन जोतिरहेकाहरुको आफ्नो नाममा जग्गा आउन नसकेको भन्दै यसतर्फ पनि सरकारको ध्यानाकर्षण गराए । ‘देशै भरी गुठीसँग सम्बन्धित समस्या छ । हाम्रो सरकार, हामी राजनीतिक दलहरु सबै हामी समाजवादी हौँ भन्छौँ र किसानलाई न्याय दिन्छौँ भन्छौँ । तर जसले जमिन जोतिरहेको छ, वर्षौदेखि, पुस्तौँ पुस्तादेखि तिनका नाममा बाबु, बराजु सबै बितिसके । आज पनि उनको जमिन दर्ता हुन सकेको छैन । ती खोटो माल भएका छन्’ सांसद बाँस्कोटाले भने । त्यसैगरी नेपाली कांग्रेसका सांसद गगनकुमार थापाले सहकारी पीडितहरूको रकम यथासीघ्र फिर्ताको माग गरेका छन् । प्रतिनिधिसभा बैठकमा बोल्दै कांग्रेस महामन्त्री समेत रहेका थापाले पीडितहरूको रोकिएको रकम फिर्ता गर्न सरकार जिम्मेवार हुनुपर्ने बताएका हुन् । उनले सहकारी सुधार्न गठित कार्यदलले प्रतिवेदन बुझाइसकेको र सोही प्रतिवदेनअनुसार आजैबाट पीडितहरूलाई रकम फिर्ता हुनुपर्ने बताए । ’सरकारले सहकारी सुधार गर्न वैशाख २६ गते अध्ययन कार्यदल गठन गरेको थियो । यो अध्ययन कार्यदलले २७ बुँदामा प्रतिवेदन बुझाइसकेको छ । यो प्रतिवेदनमा धेरै कुरा समेटिएका छन्,’ उनले भने,’ बचनकर्ता जसको रकम रोकिएको छ, फिर्ता गराउनका लागि आजैबाट प्रारम्भ गरियोस् । हामी अब सहकारी पीडितको समाचार होइन, न्याय पाएको समाचार सुन्न चाहन्छौं ।’ सांसद थापाले सहकारी पीडितको आवाज राज्यले सुन्नैपर्ने बताए । उनले भने, ’केही दिनअघिसम्म हामी सांसदहरूको घरमा सहकारी पीडितहरूको रुवाबासी चल्थ्यो । घरघरमा आएर रुवाबासी गरेर भएन भनेर मण्डलामा जम्मा भएर हामी सबैलाई सुनाउन लागिपरेका छन् । यिनको आवाज राज्यले सुन्नैपर्छ, किनकि यिनको जुन अवस्था भएको छ यसको जिम्मेवार राज्य पनि एक हो ।’
