काठमाडौं । राप्रपा अध्यक्ष तथा सांसद राजेन्द्र लिङ्देनले संसदलाई तीन दलले बन्धक बनाएको भन्दै आपत्ति जनाएका छन् । प्रतिनिधिसभा बैठकमा उनले कांग्रेस, एमाले र माओवादी केन्द्रले संसद र देशलाई नै बन्धक बनाएको भन्दै आपत्ति जनाएका हुन् । समावेशी संविधान बनाएको र सोहीअनुसार संसद पनि गठन भएको भन्दै उनले तीन दलले निषेधको राजनीति गरेको आरोप लगाएका हुन् । सहकारीपीडित संघर्षमा उत्रिएको जानकारी गराउँदै उनीहरुलाई न्याय दिन सरकारले नसकेको उनले बताएका छन् । देश र जनता विभिन्न समस्याबाट पीडित भइरहँदा प्रमुख तीन दलबीच भागबन्डामा भने सहमति हुने गरेको उनको भनाइ छ । प्रतिपक्षी दल मात्र होइन सरकार पनि संसद नचलोस् भन्नेमा रहेको अध्यक्ष लिङ्देनले आरोप लगाएका छन् । त्यसैगरी उपप्रधान तथा गृहमन्त्री नारायणकाजी श्रेष्ठले ‘अध्ययन/अनुसन्धान र तथ्य प्रमाणको आधारमा जहाँसम्म जानुपर्छ त्यहाँसम्म जानुस भनेर प्रहरीलाई ‘स्टाइनबाई’ निर्देशन दिएको बताएका छन् । तेह्र दिनपछि सुचारु संसद बैठकमा सुन, ललिता निवास र भुटानी शरणार्थी प्रकरणबारे सरकार माथि उठाइएका प्रश्नहरुको जवाफ दिंदै उनले उक्त कुरा बताएका हुन । उनले अध्ययन, अनुसन्धान, तथ्य र प्रमाणले दोषी देखाउनेहरु कोही पनि उम्किन र छुटन नपाउने प्रतिवद्धता जनाए । त्यसैगरी प्रमुख प्रतिपक्षी दल नेकपा एमालेले सुन तस्करी प्रकरणमा गृहमन्त्री नारायणकाजी श्रेष्ठ र अर्थमन्त्री प्रकाशशरण महतमाथि आशंका रहेको भन्दै छानबिन गर्नुपर्ने माग गरेको छ । संसदमा गृहमन्त्री श्रेष्ठले जवाफ दिँदै उच्च स्तरीय छानबिन समिति नबनाउने उद्घोष गरेपछि एमाले सांसद महेश बर्तौलाले त्यसको विरोध गर्दै गृहमन्त्री र अर्थमन्त्रीमाथि पनि छानबिन हुनुपर्ने बताएका छन् ।
