काठमाडौँ । पेट्रोलियम पदार्थमा मूल्यवृद्धि भएसँगै काठमाडौँ उपत्यकासहित बागमती प्रदेशले गाडी भाडा समायोजन गरेको छ । यही भदौ ४ गते बसेको बागमती प्रदेशको श्रम, रोजगार तथा यातायात मन्त्रालयको मन्त्रीस्तरीय निणर्यले भाडा समायोजन गरेको हो । काठमाडौं उपत्यकाभित्र गुड्ने सार्वजनिक सवारीमा ५ किलोमिटरसम्म १९ रुपैयाँ भाडा पुर्याइएको छ । यसअघि १८ रुपैयाँ भाडा कायम थियो । उपत्यकामा १० किलोमिटरसम्म २६, १५ किलोमिटरसम्म ३१, २० किलोमिटरसम्म ३५ र २० किलोमिटरभन्दा माथिको दूरीमा ४० रुपैयाँ भाडा कायम गरिएको छ । यस्तै ट्याक्सी भाडा पनि बढेको छ । सुरु फ्याग डाउन ५२ रुपैयाँ कायम गरिएको छ । प्रति २०० मिटर १० रुपैयाँ ३४ पैसा कायम गरिएको बागमती प्रदेशको राजपत्रमा उल्लेख छ । प्रदेशभित्र चल्ने सार्वजनिक सवारीको पनि भाडा बढेको छ । काठमाडौं-नारायणगढको भाडा ४३३ रुपैयाँ पुर्याइएको छ । काठमाडौं हेटौंडासम्मको भाडा ६५५ रुपैयाँ कायम भएको छ । काठमाडौं-पनौतीसम्मको भाडा ९२ रुपैयाँ पुर्याइएको छ । काठमाडौं-बाह्रबिसेसम्मको भाडा ३०३ रुपैयाँ कायम भएको छ । काठमाडौं-बल्खु-हेटौंडासम्मको भाडा ६४२ रुपैयाँ कायम भएको छ । नारायणगढ-धादिङबेसीसम्मको भाडा ३०६ रुपैयाँ कायम भएको छ । काठमाडौं-जिरीसम्मको भाडा १ हजार ३८ रुपैयाँ कायम भएको छ । त्यसैगरी नेपाली कांग्रेसका नेता प्रकाशमान सिंहले अब कांग्रेसको मूल एजेण्डा आर्थिक क्रान्ति हुनुपर्ने बताएका छन् । नेपाली कांग्रेस काठमाडौं क्षेत्र नं. ३ प्रदेश ‘क’ले आयोजना गरेको प्रदेश सम्मेलनलाई उद्घाटन गर्दै उनले अब आर्थिक क्रान्ति कांग्रेसको मूल एजेण्डा हुनुपर्ने बताएका हुन् । उनले जनतालाई काम गर्ने र गरिखाने वातावरण निर्माणमा कांग्रेस लाग्नुपर्ने बताए । पार्टीका पूर्वमहामन्त्री सिंहले पार्टीभित्र सबैलाई समान अवसर प्रदान गर्न सके मात्र कांग्रेस बलियो हुने उल्लेख गरे । कांग्रेसले जनताको चाहनाअनुसार कार्यक्रम लिएर अगाडि बढ्नुपर्ने उनको भनाइ थियो । कांग्रेस केन्द्रीय सदस्य अम्बिका बस्नेतले कांग्रेसका जनप्रतिनिधिको कामका आधारमा पार्टी बलियो हुने भएकाले जनतामाझ राम्रो काम गरेर देखाउन जनप्रतिनिधिलाई आग्रह गरे । कांग्रेस बागमती प्रदेशका सभापति ईन्द्रबहादुर बानियाँले पार्टीका जिम्मेवार पदमा बसेका व्यक्तिले जिम्मेवारबोधका साथ काम गरे पार्टी बलियो हुने धारणा राखे । उनले पार्टीभित्र देखिएका समस्या पार्टीका नेता बसेर नै समाधान गर्नुपर्ने उल्लेख गरे । त्यसैगरी नेकपा एमालेका अध्यक्ष केपी शर्मा ओलीले भ्रष्टाचार रोक्नु हरेक नागरिकको कर्तव्य हुने बताएका छन् । भक्तपुरमा आयोजित नेपाल राष्ट्रिय भूतपूर्व सैनिक तथा प्रहरी संगठनको भेलालाई सम्बोधन गर्दै ओलीले भ्रष्टाचार र तस्करी भयो भने विकास नहुने बताएका हुन् । सेना, प्रहरी भनेको सचेत समुदाय भएको र विभिन्न समुदाय र संस्कृति चिनेको हुने बताए । ओलीले पेन्सनले मात्र जीविका चलाउन गाह्रो हुने भएकाले सेना, प्रहरीबाट अवकाश प्राप्त भएपछि पनि अन्य काम गर्न उनीहरु सक्षम हुने बताए ।
