काठमाडौं । प्रमुख प्रतिपक्ष दल नेकपा (एमाले) का सांसद एवं पूर्वमन्त्री रघुजी पन्तले प्रधानमन्त्री पुष्पकमल दाहालले आफ्नो चीन भ्रमणमा पेट्रोलियम पदार्थ (तेल) र रेल नेपालमा ल्याउने कुरामा विशेष पहल गर्नुपर्ने बताएका छन् । प्रतिनिधि सभा बैठकमा विशेष समय लिएर बोल्दै उनले भारततिर संकेत गर्दै नाकाबन्दीको मारबाट राष्ट्रलाई मुक्त गराउन पनि प्रधानमन्त्री दाहालले आफ्नो चीन भ्रमणमा पेट्रोलियम पदार्थ र रेल ल्याउने कुरालाई प्राथमिकताका साथ अघि बढाउनुपर्ने बताएका हुन् । सांसद पन्तले जलासाययुक्त विद्युत् आयोजनामा लगानी भित्र्याउन पनि चीनसँग आग्रह गर्न प्रधानमन्त्री पुष्पकमल दाहाललाई सुझाव दिएका छन् । उनले ट्रान्समिसन लाइन निर्माणको काममा पनि जोड दिन सरकारलाई सचेत गराए । सांसद पन्तले नेपाल अझै पनि विद्युतमा आत्मनिर्भर नभएको उल्लेख गर्दै त्यसमा आत्मनिर्भर बनाउन सरकारले जलाशययुक्त आयोजनाहरुको निर्माणमा ध्यान दिनुपर्ने जिकिर गरेका छन् । त्यसैगरी नेपाली कांग्रेसका नेता डा. शेखर कोइरालाले संक्रमणकालीन न्यायसंग सम्बन्धित कानुनलाई लागू हुने गरी सदनबाट पारित गर्नुपर्ने बताएका छन् । संसद भवन नयाँ बानेश्वरमा सञ्चारकर्मीसँग कुरा गर्दै नेता कोइरालाले सबैको भावनालाई मध्यनजर गर्दै संक्रमणकालीन न्यायसँग सम्बन्धि कानुनलाई अन्तिम रुप दिएर सदनबाट पारित गराउनुपर्ने बताएका हुन् । कानून बनाउदा कतिपय विषयलाई नजरअन्दाज गर्दा अदालतमा पुग्ने र कानून लागू गर्न नसकिने अवस्था सिर्जना हुने भएकाले मानव अधिकारको मूल्यमान्यतालाई समेत ध्यानमा राखेर उक्त कानून अघि बढाउनुपर्नेमा उनले जोड दिएका छन् । कोइरालाले सर्वोच्चको आदेश, अन्तराष्ट्रिय मूल्यमान्यता र पीडितलाई न्याय हुने गरी संक्रमणकालीन न्यायसंग सम्बन्धीत कानुन बढाउनुपर्ने धारणा राखेका छन् । त्यसैगरी नेपाल सरकार मन्त्रिपरिषद्को बैठकले विभिन्न निणर्यहरु गरेको छ । मन्त्रिपरिषद्को बैठकले तेजाव तथा अन्य घातक रासायनिक पदार्थ (नियमन) नियमावली स्वीकृत गर्ने तयारी गरेको छ । यस्तै संघीय निजामति सेवाको गठन, सञ्चालन र सेवाको शर्तसम्बन्धी विधेयक संघीय संसदमा पेश गर्ने निणर्य गरेको छ । सरकारका प्रवक्ता रेखा शर्माले निजामति सेवाका ४० जना कर्मचारीलाई पुरस्कृत गर्ने तयारी गरेको जानकारी दिएकी छन् । यस्तै स्वास्थ्य क्षेत्रको लैंगिक समानता तथा सामाजिक समावेशीकरण रणनीति स्वीकृत गर्ने र चिकित्सा शिक्षा आयोगको उपाध्यक्ष पदमा प्रा.डा. अञ्जनीकुमार झालाई नियुक्त गर्ने निणर्य पनि भएको छ ।
