काठमाडौँ । प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीबीच भेटवार्ता भएको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा दुई नेताबीच भेटवार्ता भएको प्रधानमन्त्रीको निजी सचिवालयले जनाएको छ । दुई नेताबिचको भेटवार्तामा हाल भईरहेको गणतन्त्र विरोधी कार्यक्रमका विषयमा कुराकानी भएको बताइएको छ । त्यसैगरी नेपाली काँग्रेस पार्टीका तीन भ्रातृ संगठनका केन्द्रीय अध्यक्षहरू तोकिएको छ । सभापति शेरबहादुर देउवाले पार्टी विधानको धारा ४२ (१) च अनुसार नेपाल प्रजातान्त्रिक सेनानी सङ्घमा बालकृष्ण दाहाल (ओखलढुङ्गा), नेपाल भूतपूर्व सैनिक सङ्घमा मेघराज टण्डन (कपिलवस्तु) र राष्ट्रिय लोकतान्त्रिक अपाङ्ग संघको अध्यक्षमा प्रकाश पन्थ (तनहुँ) नियुक्त गरेका हुन् । नेपाल ठाकुर संघको केन्द्रीय समिति विघटन गरेको लामो समय भएपनि अझै अध्यक्ष तोकिएको छैन । काँग्रेसका १३ वटा भ्रातृ संगठन छन् । पार्टीभित्रको किचलोले भ्रातृ सङ्गठनहरूको आवधिक महाधिवेशन हुन सकेको छैन । त्यसैगरी कैदीबन्दीमा सकारात्मक सोचको विकास गर्ने ध्येयले सरकारले योग साधनाको अवधारणालाई अघि बढाउने भएको छ । आपराधिक क्रियाकलापमा संलग्न भएको अभियोगमा जेल जीवन बिताइरहेका कैदीबन्दीलाई लक्षित गर्दै गृह मन्त्रालयमा बसेको बैठकले नक्खु कारागारबाट शिविर सञ्चालन गर्ने निणर्य गरेको हो । गृह मन्त्रालय र मातहतका निकायमा स्वजागरणका रूपमा योगाभ्यास संस्कृतिलाई अगाडि बढाउने अभियानअन्तर्गत देशभरका कारागारमा योग शिविर सञ्चालन हुने भएको हो । एक महिनाभित्रै नक्खु कारागारमा हुने दश दिवसीय शिविरपछि अरू कारागारमा पनि त्यही स्वरुपको शिविर आयोजना गरिने भएको छ । नेपाल विपश्यना केन्द्रका धर्मसेवक सुशील शाहका अनुसार केन्द्रकै व्यवस्थापनमा शिविर सञ्चालन हुनेछ ।
