काठमाडौं । राष्ट्रपति रामचन्द्र पौडेलको उपस्थितिमा सर्वोच्च अदालतका प्रधानन्यायाधीश विश्वम्भरप्रसाद श्रेष्ठले नवनियुक्त सर्वोच्च अदालतका न्यायाधीशहरुलाई पद तथा गोपनीयताको शपथ गराएका छन् । राष्ट्रपति भवन शीतलनिवासमा भएको सो शपथ ग्रहण कार्यक्रममा पद तथा गोपनीयताको शपथ लिनुहुने न्यायाधीशहरुमा सारङ्गा सुवेदी, अब्दुल अजिज मुसलमान, महेश शर्मा पौडेल, टेकप्रसाद ढुंगाना, सुनिलकुमार पोखरेल र बालकृष्ण ढकाल छन् । त्यसैगरी प्रधानमन्त्री पुष्पकमल दाहालले मुलुकको आर्थिक विकासका लागि महत्वपूणर् मानिएको ऊर्जा क्षेत्रको विकासमा प्रभावकारी रुपमा काम गर्न निर्देशन दिएका छन् । उनले जलविद्युत् आयोजनाको अनुमति पत्र होल्ड गरेर बस्ने तर आयोजनाको काम नगर्नेको लाइसेन्स खारेज गर्न ऊर्जा, जलस्रोत तथा सिँचाइ मन्त्रालयलाई निर्देशनसमेत दिएका छन् । प्रधानमन्त्री तथा मन्त्रिपरिषद्को कार्यालय सिंहदरबारमा आयोजित सञ्चार तथा सूचना प्रविधि मन्त्रालय र ऊर्जा, जलस्रोत तथा सिँचाइ मन्त्रालयको संयुक्त समीक्षा बैठक एवं दिशानिर्देशमा प्रधानमन्त्री दाहालले सो निर्देशन दिएका हुन् । कृषि उत्पादन वृद्धिका निम्ति सिँचाइको व्यवस्था आवश्यक रहेको तथा लिफ्ट सिँचाइका बारेमा पनि सोच्नुपर्ने उल्लेख गर्दै नदी प्रणालीलाई जोडेर सिँचाइको दीर्घकालीन व्यवस्थापन गर्नेतिर लाग्नुपर्ने प्रधानमन्त्री दाहालको भनाइ थियो । त्यसैगरी संस्कृति, पर्यटन तथा नागरिक उड्डयनमन्त्री सुदन किराँतीले अतिवादलाई परास्त गर्नुपर्ने बताएका छन् । मन्त्री किरातीले काठमाडौंमा आयोजित उपत्यका व्यापी संयुक्त बृहत ख्रीष्टमस महोत्सव कार्यक्रममा ‘क्रिस्चियन धर्म नमान्ने देशद्रोही हुन्, क्रिश्चियनलाई मान्दिनँ भन्नु संविधानलाई मान्दिनँ’ भन्ने अभिव्यक्ति दिएर आलोचना हुन थालेपछि उनले अतिवादलाई परास्त गर्दै राष्ट्रिय एकता कायम गर्नुपर्ने बताएका हुन् । उनले संसारमा ३० प्रतिशत मान्छेले क्रिश्चियन धर्म मान्ने भन्दै संसारले मानेको धर्म हामीले नेपालमा किन नमान्ने भन्दै प्रश्न गरेका छन् । किरातीको अभिव्यक्ति पश्चात सर्वत्र उनको आलोचना हुन थालेको छ । हिन्दू धर्म मान्दै आएकाहरुले उनको अभिव्यक्तिलाई लिएर चाबहिलमा राजीनामाको समेत माग गरिएको छ । राष्ट्रिय स्वतन्त्र पार्टीका सभापति रवि लामिछानेले संस्कृति मन्त्री किराँतीको पछिल्लो अभिव्यक्ति खेदजनक भएको बताएका छन् । यस्तै एमालेका नेता एवम् पूर्वसञ्चारमन्त्री गोकुल बास्कोटाले किरातीको अभिव्यक्तिले माओवादी अरु कसैका लागि सेवा दिने मिसनरी उद्योग हो भन्ने फेरि प्रमाणित भएको आरोप लगाएका छन् ।
