काठमाडौं । निर्वाचन आयोगले माघ ११ गते हुने राष्ट्रियसभा सदस्य निर्वाचनका लागि अन्तिम मतदाता नामावली प्रकाशन गरेको छ । आयोगले सातवटै प्रदेशको निर्वाचन अधिकृतको कार्यालयमा अन्तिम मतदाता नामावली प्रकाशन गरेको हो । प्रकाशित नामावली अनुसार कोशी प्रदेशमा प्रदेश सभा सदस्य तर्फको मतदाता सङ्ख्या ९३ तथा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख तर्फको मतदाता सङ्ख्या २७४ गरी जम्मा ३६७ जना मतदाता कायम भएको आयोगले जनाएको छ । जसअनुसार बागमती प्रदेशमा प्रदेश सभा सदस्य तर्फको मतदाता सङ्ख्या ११० तथा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख तर्फको मतदाता सङ्ख्या २३७ गरी जम्मा ३४७ जना मतदाता मतदानमा सहभागी हुनेछन् । बागमती प्रदेशमा प्रदेश सभा सदस्यको मतभार ५८३० र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख तर्फको मतभार ४५०३ गरी जम्मा १०३३३ मतभार कायम हुनेछ । गण्डकी प्रदेशमा प्रदेश सभा सदस्य तर्फको मतदाता सङ्ख्या ६० तथा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख तर्फको मतदाता सङ्ख्या १७० गरी जम्मा २३० जना मतदाता कायम भएका छन् । गण्डकी प्रदेशमा प्रदेश सभा सदस्यको मतभार ३१८० र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख तर्फको मतभार ३२३० गरी जम्मा ६४१० मतभार कायम हुनेछ । यसैबीच राष्ट्रिय सभाका उम्मेदवारका विषयमा नेपाली कांग्रेसका सभापति शेरबहादुर देउवासँग सिट भागबण्डाको कुरा नमिलेपछि नेता डा. शेखर कोइराला पक्षले आफूपक्षीय नेताहरूको छुट्टै बैठक बोलाएको छ । निर्वाचनका लागि गठबन्धनमा कांग्रेसले पाएको १० सिट मध्ये संस्थापनइतर पक्षले चार सिटमा दाबी गरेको छ । तर, सभापति देउवा यसका लागि तयार नभएपछि इतर पक्षले छुट्टै भेला बोलाएको हो । पार्टीको कार्यसम्पादन समितिको बैठक बस्नुअघि संस्थापनइतर पक्षका नेता डा. शेखर कोइराला र महामन्त्री गगन थापा लगायतका नेताहरूसँग छलफल थालेका हुन् । कांग्रेस स्रोतका अनुसार राष्ट्रियसभा उम्मेदवारको बारेमा छलफल गर्न नेता कोइराला र महामन्त्री थापा सभापति देउवासँग छलफल गर्न धुम्बाराही गएका थिए । आन्तरिक छलफल लगत्तै बस्ने कार्यसम्पादन समितिको बैठकले उम्मेदवार टुङ्ग्याउने कांग्रेसको तयारी छ । त्यसैगरी नेकपा एमालेका वरिष्ठ उपाध्यक्ष ईश्वर पोखरेलले वर्तमान सत्ता गठबन्धन सामाजिक सद्भाव भड्काउन प्रयत्नशील रहेको बताएका छन् । राष्ट्रिय अपाङ्गता संगठन नेपालद्वारा आयोजित कार्यक्रमलाई सम्बोधन गर्दै पोखरेलले एमालेले सामाजिक सद्भाव नखलबलियोस् र राष्ट्रिय एकता कमजोर नहोस् भनेर सधैँ सामाजिक सद्भावको पक्षमा काम गर्दै आएको स्मरण गराएका छन् । पोखरेलले अहिले राष्ट्रिय स्वाभिमान र स्वतन्त्रताको कुरा कमजोर बनेको बताएका छन् । हिजो सरकारमा हुँदा विदेशीले अतिक्रमण गरेको भूमि फिर्ता लिनुपर्छ भनेर सम्पूणर् देश भरिका शक्तिलाई एक ठाउँमा उभ्याउने काम एमालेले गरेको उनले बताएका छन् । तर अहिले गठबन्धनका प्रधानमन्त्रीले भारत भ्रमणमा जाँदा त्यसको बारेमा बोल्न समेत नसकेको बताएका छन् । भारतीय राजदूतावासले नेपालमा आफूखुसी २० करोड रुपैँयासम्मका योजनामा खर्च गर्ने गरी सरकारले गरेको सम्झौता एमालेलाई मान्य नरहेको पोखरेलले बताएका छन् ।
