काठमाडौं । काठमाडौं, तार्केश्वर नगरपालिका-८ शेषमती भेटघाट चोक बस्ने ५१ वर्षीय कृष्ण प्रसाद पौडेलको घरमा कोही नभएको अवस्थामा ताला फुटाई नगद ४० हजार रूपैयाँ र सुनका विभिन्न गरगहना गरी करिब ३ लाख ४० हजार रूपैयाँ बराबरको धनमाल दिउँसो चोरी भएको छ । नवलपरासी पूर्व, गैंडाकोट नगरपालिका-१६ सोह्र नम्बर चोकस्थित यम प्रसाद पौडेलको पौडेल मोबाइल लिंक पसलको सटरको ताला फोडेर पसलभित्र रहेको मोबाइल लगायत विभिन्न सर-सामानहरू गरी करिब १६ लाख रूपैयाँ बराबरको धनमाल गएराति चोरी भएको छ । त्यस्तै कपिलवस्तु, कपिलवस्तु नगरपालिका-१ आन्दोलन चोकबाट अवैध लागूऔषध ब्राउनसुगर जस्तो देखिने पदार्थ ३ सय ६० मिलिग्रामसहित बाणगंगा नगरपालिका-४ गजेहडा बस्ने गुल्मी घर भएका २२ वर्षीय निश्चल कालिराजलाई राति प्रहरीले पक्राउ गरेको छ । जिल्ला प्रहरी कार्यालय कपिलवस्तुबाट खटिएको प्रहरीले उनलाई उक्त पदार्थसहित पक्राउ गरेको हो । ललितपुर, ललितपुर महानगरपालिका-४ नख्खुदोबाटो खरिबोटबाट नियन्त्रित लागूऔषध नुर्फ्रिरन १ सय ४३ एम्पुल, डाईजेपाम १ सय ५२ एम्पुल र फेनारगन १ सय २८ एम्पुलसहित ललितपुर महानगरपालिका-२५ भैसिपाटी बस्ने ३२ वर्षीय सुरेश पण्डित क्षेत्रीलाई साँझ प्रहरीले पक्राउ गरेको छ । प्रहरी प्रभाग सानेपाबाट खटिएको प्रहरीले ललितपुर भैसिपाटीदेखि जावलाखेलतर्फ जाँदै गरेको बा.४ च ८८७४ नम्बरको पिकअप भ्यानलाई जाँच गर्न क्रममा उक्त लागूऔषध फेला पारी चालक क्षेत्रीलाई पक्राउ गरेको हो ।
