काठमाडौं । उपप्रधानमन्त्री तथा गृहमन्त्री रवि लामिछानेले विपद्को समयमा नीतिगत कुराहरूलाई देखाएर काम नरोक्न निर्देशन दिएका छन् । विपद् जोखिम न्यूनीकरण तथा व्यवस्थापन कार्यकारी समितिको २३ औँ बैठकलाई सम्बोधन गर्दै गृहमन्त्री लामिछानेले नीतिगत कुराहरूमा समस्या देखाउँदै विपद् व्यवस्थापन सम्बन्धी काम नरोक्न सरोकारवाला निकायलाई निर्देशन दिएका हुन् । उनले नीतिगत समस्या भएमा आफूलाई जेठ महिनाको अन्त्यसम्ममा जानकारी गराउन आग्रह गरेका छन् । विपद् व्यवस्थापनको सम्बन्धमा देखा पर्ने नीतिगत समस्याहरुलाई छिटोभन्दा छिटो समाधान गर्न आफू तयार रहेको उनको भनाई थियो । मन्त्री लामिछानेले विपद्को बेलामा नागरिकको ज्यान जोगाउने कुरा महत्वपूणर् हुने भन्दै नीति, नियम र कार्यविधिहरुले स्रोत, साधनलाई परिचालन गर्न रोक्नु नहुने जिकिर गरेका छन् । उनले आपत् परेको बेलामा यो वा त्यो प्रक्रियाले दिएन भनेर कुनैपनि काम रोकिनु नहुने बताउँदै अझ छिटो गर्न सकिने ठाउँ हेरेर काम गर्नुपर्ने बताएका छन् । त्यसैगरी राष्ट्रिय जनमोर्चाका सांसद चित्रबहादुर केसीले संसदमा बजेटमाथिको छलफलको औचित्यमाथि प्रश्न उठाएका छन् । प्रतिनिधिसभामा जारी बजेटमाथिको छलफलमा भाग लिदै केसीले संसदमा जति बहस र छलफल गरेपनि बजेटमा कुनै परिवर्तन नहुने भएकाले बजेटमाथिको छलफलको औचित्य नभएको टिप्पणी गरेका हुन् । उनले बजेटको छलफल उत्साहजनक नरहेकाले आफू बैठकमा निदाएको बताएका छन् । उनले बजेटमा सरकारले संविधानमा व्यवस्था गरेबमोजिम समाजवाद उन्मुख कार्यक्रमलाई प्राथमिकता दिन नसकेको बताउँदै नीति तथा कार्यक्रम भन्दा फरक रुपमा बजेट आएको टिप्पणी गरेका छन् । त्यसैगरी नेपाली कांग्रेसका सांसद डा.चन्द्रकान्त भण्डारीले बजेटले नेपालभित्रको नेपाल खोज्न प्रयास गरेको तर नेपालीलाई खोज्न नसकेको टिप्पणी गरेका छन् । प्रतिनिधिसभा बैठकमा आर्थिक वर्ष २०८१/०८२ को बजेटमाथि छलफलमा सांसद भण्डारीले बजेटले नेपालभित्र नेपालीहरूलाई खोज्न नसकेको बताएका छन् । मुलुकमा उत्पादन र रोजगारी घट्दै गएको भन्दै उनले यस विषयमा गम्भीर भएर सोच्नुपर्ने बताएका छन् । नेता भण्डारीले तोकिएकै समयमा सडक, खानेपानी र सिंचाइ आयोजनाहरू सम्पन्न गर्नुपर्नेमा जोड दिएका छन् ।
