काठमाडौं । नेकपा एमालेले प्रधानमन्त्री पुष्पकमल दाहाल नेतृत्वको सरकारलाई दिएको समर्थन फिर्ता लिएको छ । एमालेका प्रमुख सचेतक महेश बर्तौलाले पार्टीको निणर्यअनुसार सरकारलाई दिएको समर्थन फिर्ता लिएको बताएका छन् । एमालेका मन्त्रीहरूले पनि प्रधानमन्त्रीसमक्ष राजीनामा बुझाउने तयारी गरेको बताइएको छ । एमालेको सचिवालय बैठकले प्रधानमन्त्री दाहाललाई २४ घन्टाभित्र राजीनामा दिएर राष्ट्रिय सहमतिको सरकार निर्माणका लागि मार्ग प्रशस्त गरिदिन आग्रह गरेको बताइएको छ । प्रधानमन्त्रीलाई दिएको समय सकिएपछि एमालेले समर्थन फिर्ता लिनुको साथै मन्त्रीहरूलाई समेत फिर्ता बोलाएको छ । दाहाल नेतृत्वको सरकारमा एमालेका ८ जना मन्त्री सहभागी थिए । यसैबीच नेपाली कांग्रेसले मुलुकमा राजनीतिक स्थिरता कायम गर्न राष्ट्रिय सहमतिको सरकार आवश्यक परेको बताएको छ । साथै एमाले-कांग्रेसबीचको सहिमतिलाई पनि औपचारिकता दिएको छ । पार्टी सभापति शेरबहादुर देउवाको सभापतित्वमा बुढानिलकण्ठस्थित सभापति निवासमा सम्पन्न बैठकमा राष्ट्रिय सहमतिको सरकारको नेतृत्व पहिला नेकपा (एमाले) का अध्यक्ष केपी शर्मा ओली र दोस्रो पटक सभापति शेरबहादुर देउवाले गर्ने गरी सहमति भएको कांग्रेसका मुख्य सचिव कृष्णप्रसाद पौडेलले जानकारी दिएका छन् । बैठकले नेपाली कांग्रेस र नेकपा (एमाले) बीच असार १७ गते सम्पन्न राष्ट्रिय सहमतिको सरकार गठन सम्बन्धी सहमतिलाई स्वागत गर्दै समर्थन गरेको उनले बताएका छन् । कांग्रेसले राष्ट्रिय हितको रक्षा गर्न, भ्रष्टाचार नियन्त्रण गरी सुशासन कायम गर्न, विकास निर्माणको अभियानलाई तीव्रता दिन, राजनीतिक स्थिरता कायम गर्न, संविधानको अभ्यासको समीक्षा गरी संघीय लोकतान्त्रिक गणतन्त्रात्मक व्यवस्था र समावेशीतालाई सुदृढ गर्न, अर्थतन्त्रलाई बलियो बनाउन, र यी उद्देश्य प्राप्तिका लागि राष्ट्रिय सहमतिको सरकारको नेतृत्व आवश्यक परेको बताइएको छ । त्यसैगरी लोकतान्त्रिक समाजवादी पार्टी नेपाल (लोसपा) ले नयाँ समीकरण अनुसार बनेको कांग्रेस-एमाले गठबन्धनलाई साथ दिने निणर्य गरेको छ । बबरमहलस्थित पार्टी कार्यालयमा बसेको लोसपा नेपालको पदाधिकारी बैठकले सो निणर्य गरेको हो । कांग्रेसका सभापति शेरबहादुर देउवाले पुरानो गठबन्धनमा रहेका दलहरूसँग छलफल गरेका थिए । सो छलफल बारे बैठकमा लोसपा नेपालका अध्यक्ष महन्थ ठाकुरले ब्रिफिङ गरेका थिए । कांग्रेस सभापति देउवाले गठबन्धनले बनाउने सरकारलाई साथ दिन आग्रह गरेको अध्यक्ष ठाकुरले बैठकमा ब्रिफिङ गरेका थिए ।
