काठमाडौं । नक्कली भुटानी शरणार्थी प्रकरणमा पक्राउ परेका बेचन झालाई ५ दिन थुनामा राख्न जिल्ला आदालत काठमाडौंले अनुमति दिएको छ । प्रहरीले अदालतमा उपस्थित गराउँदै दोस्रो पटक अनुसन्धानका लागि म्याद मागेको थियो । संगठित अपराधमा अनुसन्धान गरिरहेकाले ६० दिनको हदम्यादमा यो दोस्रो पटक थुनामा राख्ने अनुमति अदालतले दिएको हो । जिल्ला प्रहरी परिसर काठमाडौँले ठगी र संगठित अपराध अन्तर्गतको कसुरमा अनुसन्धानका लागि हिरासतमा राख्न अनुमति माग्दै जिल्ला अदालत काठमाडौँमा उपस्थित गराएको थियो । त्यसैगरी नेकपा एकीकृत समाजवादीका महासचिव घनश्याम भुसालले प्रधानमन्त्रीले सदनमा विश्वासको मत लिए पक्षमा मतदान गर्ने बताएका छन् । पार्टीको महाधिवेशन स्थल प्रज्ञा भवनमा सञ्चारकर्मीसँग कुरा गर्दै भुसालले विश्वासको मत लिने वा नलिने अधिकार प्रधानमन्त्रीलाई रहेको भन्दै प्रधानमन्त्रीले सदनमा विश्वासको मत लिए पक्षमा मतदान गर्ने बताएका छन् । उनले प्रधानमन्त्री पुष्पकमल दाहालले सरकार नछाडेसम्म सरकारलाई दिएको समर्थन फिर्ता नलिने स्पष्ट पारेका छन् । कांग्रेस-एमालेबीचको सहमतिलाई सतकर्ताका साथ हेरिरहेको उनको भनाइ छ । उनले संविधान संशोधनको मुद्दा स्पष्टरूपमा बाहिर आइनसकेको भन्दै स्पष्टरूपमा आए पार्टीमा छलफल गर्ने जिकिर गरेका छन् । उनले पार्टी नेतृत्व चयनका विषयमा सकारात्मकरूपमा सहमतिको प्रयास भइरहेको भन्दै निरास हुनुपर्ने अवस्था नरहेको बताएका छन् । यसैबीच नेपाली कांग्रेसका महामन्त्री गगन थापाले कांग्रेससँग सत्ता सहकार्य गर्दा एमाले अध्यक्ष केपी ओलीले ठिक ढंगले हेक्का राखेर अघि बढ्नुपर्ने नत्र अप्ठ्यारो हुने चेतावनी दिएका छन् । उनले ओलीले ठिक ढंगले हेक्का राखेमा समस्या नहुने नत्र गडबड हुने जिकिर गरेका छन् । उनले विगतमा एमालेसहितसँग सहकार्य गर्दा काँग्रेसका नेता गिरिजाप्रसाद कोइराला र सुशील कोइरालाले ठिक ढंगले हेक्का राखेकै कारण ठूला उपलब्धि हासिल भएकाले गर्दा अब केपी ओलीको पालो आएको बताएका छन् । अहिले पनि प्रधानमन्त्री दाहालले राजीनामा नदिएर जालझेल गरी रहेको उनले टिप्पणी गरेका छन् । नेता थापाले सरकार काँग्रेस र एमाले नै मिलेर चलाउने राष्ट्रिय सहमति जरुरी नभएको पनि बताएका छन् । त्यस्तै नेता थापाले गठबन्धन बन्ने र भत्किने प्रक्रिया पनि सामान्य भएको बताएका छन् । उनले अबको चुनावबाट काँग्रेसले ठूलो सफलता प्राप्ति गरेर अविकसित र अल्पविकसितको सूचीभन्दा नेपाललाई माथि पार्ने ंढंगले काम गर्न सक्नुपर्ने बताएका छन् ।
