काठमाडौँ । नेपाली कांग्रेस संसदीय दलका प्रमुख सचेतक रमेश लेखकले अब बन्ने सरकार संविधानको धारा ७६ (२) अनुसार नै बन्ने स्पष्ट गरेका छन् । पार्टी संसदीय दलको बैठकपछि बोल्दै लेखकले अब संविधानको धारा ७६ (२) अनुसार नै एमाले अध्यक्ष केपी शर्मा ओलीको नेतृत्वमा सरकार गठन हुने बताएका हुन् । लेखकले संसदीय दलको बैठकले कांग्रेस-एमालेबीच भएको सहमतिलाई स्वीकार गर्दै कार्यान्वयन गर्न प्रतिबद्धता जनाउने निणर्य गरेको जानकारी दिएका छन् । यसैबीच उपप्रधान एवं गृहमन्त्री रवि लामिछानले राज्यका सबै संयन्त्रको पूणर् परिचालन गर्दै प्राकृतिक प्रकोपको क्षति न्युनीकरण गर्न निर्देशन दिएका छन् । निरन्तरको वर्षासँगै देशभर भएका विपद्का घटना र ती घटनाको व्यवस्थापनबारे गृहमन्त्रालयमा छलफल गर्दै लामिछानले सरकारले गरेको पूणर् तयारीका कारण यसअघिको भन्दा क्षति कम भएको देखिएको भन्दै जोखिम कायमै रहेकाले राज्यका सबै संयन्त्रको पूणर् परिचालन गर्दै प्राकृतिक प्रकोपको क्षति न्युनीकरण गर्न निर्देशन दिएका हुन् । उनले सीमित स्रोत साधनका कारण सरकारको तयारी पर्याप्त नभए पनि गम्भीरताका साथ फिल्डमा खटिनसमेत निर्देशन दिएका छन् । पहिरोको समस्या धेरै देखिएकाले जोखिमयुक्त क्षेत्रको पहिचान गरि बस्तीमा रहेका नागरिकलाई स्थानान्तरण गर्ने कामलाई प्राथमिकता दिनुपर्ने उनले बताएका छन् । उनले क्षति भएका स्थानका नागरिकलाई खाधान्न तथा कपडाको व्यवस्था गर्न पनि निर्देशन दिएका छन् । बैठकमा गृहसचिव एकनारायण अर्याल, नेपाल प्रहरीका महानिरीक्षक वसन्तबहादुर कुँवर, सशस्त्र प्रहरी महानिरीक्षक राजु अर्याल तथा नेपाली सेनाका उच्च अधिकारी लगायतको उपस्थिति रहेको थियो । त्यसैगरी उपप्रधान एवं परराष्ट्रमन्त्री नारायणकाजी श्रेष्ठले राजनीतिक दल र नेताहरूले संरक्षण गर्न खोज्दा सहकारी समस्या देखिएको बताएका छन् । अन्तर्राष्ट्रिय सहकारी दिवसका अवसरमा काठमाडौंमा आयोजित कार्यक्रमलाई सम्बोधन गर्दै श्रेष्ठले यस्तो बताएका हुन् । आफूलाई गृहमन्त्रीबाट हटाएको विषयमा सांकेतिक असन्तुष्टि जनाउँदै राम्रो काम गर्नेलाई टिक्न नदिने जिकीर गरेका छन् । उनले राजनीति सफा नभइकन अरु समस्या समाधान नहुने दाबी पनि गरेका छन् ।
