काठमाडौं । प्रधानमन्त्री केपी शर्मा ओलीले भ्रष्टाचार गर्ने कसैको अनुहार नहेर्ने बताएका छन् । उनले संयुक्त सरकार बने पनि भ्रष्टाचार गर्नेलाई कानुनी कठघरामा उभ्याउने प्रतिबद्धता जनाएका छन् । उनले आफूले अहिलेसम्म भ्रष्टाचार नगरेको र गर्नसमेत नदिएको जिकीर गरेका छन् । उनले राज्यको सार्वजनिक सम्पत्ति आफ्नो बनाउन कुनै जरुरी नभएको बताएका छन् । यसैबीच उपप्रधान एवं सहरी विकासमन्त्री प्रकाशमान सिंहले विधि र प्रक्रिया पूरा गरेर समयको मागअनुसार संविधान संशोधन हुन सक्ने बताएका छन् । ललितपुरमा किरात राई यायोक्खा ३७ औं स्थापना दिवसको अवसरमा आयोजित कार्यक्रमका बोल्दै मन्त्री सिंहले यस्तो बताएका हुन् । उनले संविधान बनाएर मात्र नहुने भन्दै संविधानको कार्यान्वयनमा ध्यान दिनुपर्नेमा जोड दिएका छन् । उनले समयको माग र जनचाहना बमोजिम संविधानको संशोधन गर्न सकिने व्यवस्था संविधानले नै गरेको भन्दै त्यसका लागि निश्चित विधि र प्रक्रिया पूरा गर्नुपर्ने र संविधानको मर्म पनि बुझ्नुपर्ने जिकिर गरेका छन् । समाजमा रहेको द्वन्द्व मेटिने र सबैको पहिचान भेटिने अवस्था बनाउनुपर्नेमा सबैको ध्यान जानुपर्नेमा उनको जोड थियो । त्यसैगरी गृहमन्त्री रमेश लेखकले निर्वाचनसम्बन्धी ऐन संशोधनको प्रस्तावलाई अगाडि बढाउनुपर्नेमा जोड दिएका छन् । निर्वाचन आयोगमा प्रमुख निर्वाचन आयुक्तसहितका पदाधिकारी सँगको छलफलमा गृहमन्त्री लेखकले निर्वाचनसम्बन्धी ऐन संशोधनको प्रस्ताव चाँडै संसदमा लैजानुपर्ने बताएका हुन् । निर्वाचनसम्बन्धी ऐन संशोधनको प्रस्ताव संसदमा आफूले बोक्ने गृहमन्त्री लेखकले प्रतिबद्धता व्यक्त गरेका छन् । आगामी निर्वाचनमा विदेशमा रहेका नेपालीले मतदान गर्ने पाउने गरी प्रस्ताव तयार पार्ने गृहमन्त्री लेखकको आग्रह थियो । यस्तै उनले लोकतन्त्रलाई जिवन्त राख्ने धेरै महत्वपूणर् आधार स्तम्भ मध्येको एक आवाधिक निर्वाचन भएको पनि बताएका छन् । निर्वाचन आयोगलाई थप सबल, स्वायत्त, स्वतन्त्र र सुदृढ बनाउने कुरामा सरकारका तर्फबाट कुनै कमी नहुने उनले बताएका छन् । नेपाली कांग्रेस र एमालेबिच राजनीतिक समीकरण निर्माण गर्दा संविधान संशोधन गर्ने सहमति भएको भन्दै संघीय लोकतान्त्रिक गणतन्त्रात्मक शासन व्यवस्था र समावेशी चरित्रको राज्यलाई थप सुदृढ गर्ने गरी अगाडि बढ्ने उनको भनाइ थियो ।
