काठमाडौं । प्रधानमन्त्री केपी शर्मा ओलीले आफूले १७ हजार मान्छे नमारेको भन्दै खुट्टा नकमाउने बताएका छन् । नेकपा माओवादी केन्द्रका अध्यक्ष पुष्पकमल दाहालले नेपाल पनि बंगलादेश र श्रीलंकाजस्तै हुने अभिव्यक्ति दिएपछि प्रधानमन्त्री ओलीले चर्को स्वरमा बोल्दैमा आफूले खुट्टा नकमाउने बताएका छन् । उनले नेपालको आफ्नै पहिचान र संस्कृति रहेको भन्दै बंगलादेशमा जे भयो त्यही भइनहाल्ने बताएका छन् । यसैबीच नेपाली कांग्रेसका सभापति शेरबहादुर देउवाले महामन्त्रीद्वय विश्वप्रकाश शर्मा र गगन थापासँग छलफल गरेका छन् । सभापति देउवाले महामन्त्रीद्वय गगन थापा र विश्व प्रकाश शर्माले पेश गरेको प्रस्ताव बारे पार्टीका पुर्व तथा वर्तमान पदाधिकारीहरुबीच छलफल भएको र ठोस सहमतिमा पुग्न नसकेको बताएका छन् । अब आइतबार बस्ते केन्द्रीय समितिको बैठक अघि फेरी छलफल हुने बताइएको छ । पार्टीको महासमिति बैठकमा महामन्त्री थापाले आगामी निर्वाचनदेखि कसैसँग पनि गठबन्धन गर्न नहुने र अर्का महामन्त्री शर्माले नेताहरु एक पटक राष्ट्रपति, दुई पटक प्रधानमन्त्री, तीन पटक मन्त्री र चार पटकभन्दा बढी सांसद बन्न नपाउने प्रस्ताव अगाडि सारेको विषय अहिले कांग्रेसमा विवादित बनेको छ । सभापति देउवाले दुवै महामन्त्रीका प्रस्तावलाई परिमार्जित गरेर पारित गर्न चाहेका छन् । महामन्त्री शर्माले अगाडि सारेको प्रस्ताव पारित भएमा देउवाका लागि अब प्रधानमन्त्री हुने बाटो बन्द हुने छ । सभापति देउवाले चुनावमा गठबन्धन गर्ने विषय नीतिगत नभएर पार्टीको रणनीतिक योजना भएकाले यसलाई अहिले नै निणर्य गरेर जान नहुने पक्षमा रहेका छन् । त्यस्तै देउवा पक्षले महामन्त्री शर्माले राखेको प्रस्ताव मान्य नहुने भन्दै सो प्रस्ताव फिर्ता लिनुपर्ने धारणा राख्दै आएका छन् । त्यसैगरी उपप्रधान तथा अर्थमन्त्री विष्णु पौडेलले विकासे आयोजनाहरूमा राजनीति गर्न नहुने बताएका छन् । लुम्बिनी प्रादेशिक अस्पताल बुटवलको अत्याधुनिक भवनको शिलान्यास गर्दै अर्थमन्त्री पौडेलले विकास निर्माणको सवालमा सत्तापक्ष-प्रतिपक्ष मिलेरै अगाडि बढ्नुपर्ने बताएका हुन् । विकासका काममा सत्ता-प्रतिपक्ष सँगसँगै हिँड्ने भन्दै उनले आम नागरिकले पनि जनस्तरबाट निगरानी गर्नुपर्ने बताएका छन् । महत्वपूणर् आयोजनाहरूमा ढिलासुस्ती र गुणस्तरहीन काम हुने गरेको भन्दै उनले नागरिक समाज, मिडिया, स्थानीय सरकार र प्रदेश सरकारले विशेष निगरानी गर्नुपर्नेमा जोड दिएका छन् । निर्माणाधीन अस्पताल भवनको काम समयमै सक्न र गुणस्तरमा कुनै सम्झौता नगर्न पनि निर्देशन दिएका छन् । आयोजना लिँदा तोकेको समयभन्दा छिटो पूरा गर्छौं भन्ने तर काममा ढिलासुस्ती गर्ने प्रवृत्ति मौलाएको भन्दै उनले तोकीएको समयमा तोकिएकै गुणस्तरमा काम गर्न ठेक्केदार कम्पनीलाई निर्देशन दिएका हुन् ।
