काठमाडौं । राष्ट्रपति रामचन्द्र पौडेलले ऐतिहासिक राजनीतिक उपलब्धि हाँसिल गरेर पनि अझै हामीले जनताका अपेक्षा अनुसार काम गर्न नसक्नु आदर्श राजनीतिमा आएको ह्रासका कारण भएको बताएका छन् । बीपी ट्रस्टद्वारा राष्ट्रपति भवन शीतल निवासमा आयोजित कार्यक्रमलाई सम्बोधन गर्दै राष्ट्रपति पौडेलले उक्त कुरा बताएका हुन् । उनले सत्ता जनताको सेवा गर्ने राजनीतिक साधन मात्र भएको तर कतै हामीले सत्तालाई साध्य मानेर आदर्श राजनीतिलाई टाढा राख्दा यस्तो भएको हो कि भन्ने आफूलाई चिन्ता लागिरहेको बताएका छन् । उनले सिद्धान्तमा सम्झौंता गरेको भए बीपी सायद जीवनकालभर सत्तामा रहिरहन सक्ने बताउदै वीपीले सत्ता होइन देश र जनताको हितका निम्ति सिद्धान्तप्रतिको निष्ठालाई कहिल्यै डगमगिन नदिएको स्मरण गरे । राष्ट्रपति पौडेलले संघीय लोकतान्त्रिक गणतन्त्रलाई बलियो बनाउँदै मुलुकलाई आर्थिकरूपमा समृद्ध बनाउन बीपीले अघि सार्नुभएको कल्याणकारी राज्यको अवधारणा सिद्धान्त, मूल्य मान्यता र उच्च नैतिक आर्दश राजनीति आज पनि उत्तिकै सान्दर्भिक रहेको स्पष्ट पारेका छन् । यसैबीच नेपाली कांग्रेसका केन्द्रीय सदस्य नैनसिंह महरले पार्टीमा विचार र आचरणको बहस गर्न जरुरी भइसकेको बताएका छन् । १ सय ११ औं बिपी जयन्तीका अवसरमा कांग्रेस सुर्खेतद्वारा आयोजित ‘बिपी चिन्तन र वर्तमान राजनीति’ विषयक विमर्शमा उनले यस्तो बताएका हुन् । प्रमुख दलहरू सैद्धान्तिक रूपमा फरक भएपनि व्यवहारमा एउटै भएको आरोप लागिरहेकाले कांग्रेस अरुभन्दा भिन्न छ भन्ने देखाउन पनि अपरिहार्य बनेको नेता महरले बताएका छन् । बिपी कोइरालाले कांग्रेसलाई अन्य पार्टीभन्दा विचार र व्यवहारले नै फरक देखाएको भन्दै कांग्रेसमा त्यस्तै फरक देखिने कांग्रेस चाहिएको नेता महरले बताएका छन् । उनले पार्टीको प्रमुख लक्ष्य सत्ताभन्दा पनि जनता भएकोले जनतामुखी विचार र दृष्टिकोण राखेर अगाडि बढिरहेको छौं कि छैनौं भन्ने प्रश्न आत्मबोध गरेर जनतासामू प्रस्तुत हुनपर्ने बताएका छन् । त्यसैगरी नेकपा एमालेका सांसद रघुजी पन्तले सर्वोच्चको फैसलाले जनता मारमा परेकोले पुनरावलोकनमा जानुपर्ने बताएका छन् । प्रतिनिधिसभाको बैठकमा अदालतको फैसलामा टिप्पणी गर्न मन नहुँदा नहुदै पनि उक्त फैसलाले जनता मारमा परेकोले पुनरावलोकनमा जानुपर्ने बताएका हुन् । जनताले पुनरावलोकन मार्फत न्यायपूणर् फैसला हुने अपेक्षा गरेको उनको भनाई छ । पन्तले सरकार पुनरावलोकनमा नजाने हो भने जनताको सम्पत्तिमाथिको हक हनन हुने जिकिर गरेका छन् । पन्तले जनताको हितमा कदम चाल्न काठमाडौं महानगर प्रमुख बालेन शाहलाई सुझाव दिएका छन् । उनले महानगरको आदेशका नाममा जनतालाई त्रसित बनाउन नहुने बताएका छन् । महानगरले गर्ने राम्रा काममा सदैव आफूहरुको साथ रहने उनको भनाई छ ।
