काठमाडौं । काठमाडौं, चन्द्रागिरी नगरपालिका-२ नागढुङ्गाबाट अवैध लागूऔषध खैरो हेरोइन जस्तो देखिने पदार्थ सहित ३ जनालाई दिउँसो प्रहरीले पक्राउ गरेको छ । प्रहरी प्रभाग नागढुङगा र लागूऔषध नियन्त्रण ब्यूरो शाखा कार्यालय नागढुङ्गाबाट खटिएको प्रहरीले नेपालगंजबाट काठमाडौंतर्फ आउँदै गरेको भे. १ ख ४१५९ नम्बरको बसमा सवार बाँके कोहलपुर नगरपालिका-१४ बस्ने २४ वर्षीय बिमल तामाङलाई १ ग्राम ५ सय मिलिग्राम तथा इलामबाट काठमाडौंतर्फ आउँदै गरेको प्र.१ ०१-००१ ख ४४८८ नम्बरको बसमा सवार झापा भद्रपुर गाउँपालिका-९ बस्ने २७ वर्षीय सञ्जय सुब्बा र २९ वर्षीय उज्वल राईलाई २ ग्राम ५ सय मिलिग्राम खैरो हेरोइन जस्तो देखिने पदार्थ सहित पक्राउ गरेको हो । यसैबीच कपिलवस्तु, शुद्धोधन गाउँपालिका-६ सइयाँस्थित खेतमा मायादेबी गाउँपालिका-१ पकडी बस्ने ३० वर्षीया सरिता जैशवाल मृत अवस्थामा फेला परेकी छिन् । ओखलढुंगा, खिजिदेम्वा गाउँपालिका-६ साल्मे बस्ने ८२ वर्षीया ठगमाया सुनुवार आफ्नै घरमा मृत अवस्थामा फेला परेकी छिन् । रूकुम पूर्व, पुथाउत्तरगंगा गाउँपालिका-११ दमचन बस्ने ६५ वर्षीय ओमभक्त घर्ती सोही गाउँपालिका-११ लामोटोल शिरानस्थित जंगलमा मृत अवस्थामा फेला परेका छन् । सप्तरी, राजबिराज नगरपालिका-८ पानि टंकी टोल डेरा गरी बस्ने तिलाठी कोलाइडी गाउँपालिका-१ घर भएका ४५ वर्षीय अमन सिंह राजपुत आफ्नै कोठामा मृत अवस्थामा फेला परेका छन् ।
