काठमाडौं । प्रधानमन्त्री केपी शर्मा ओलीले देशको राजनीतिक व्यवस्थामा भएको परिवर्तनपछि आर्थिक-सामाजिक क्षेत्रमा धेरै सुधार भएको बताएका छन् । नेपाल जेसिजको ५१औँ राष्ट्रिय महाधिवेशनको उद्घाटन गर्दै प्रधानमन्त्री ओलीले राजनीतिक परिवर्तनभन्दा अगाडि भएका पूर्वाधार विकास र त्यसपछिका आर्थिक विकास तथा रोजगारीका अवसर सृजनालगायत क्षेत्रमा व्यापक परिवर्तन भएको बताएका छन् । विश्व ध्यान दिवसको सन्दर्भ उल्लेख गर्दै उनले यस दिवसलाई सधैं अपनाउन र मानव हितलाई केन्द्रमा राखेर पृथ्वीलाई जोगाउन आग्रह गरेका छन् । जेसिजको लक्ष्य विश्व शान्ति, नेतृत्व विकास र उद्यमशीलता भएकाले मुलुकमा जेसिजको विस्तार भएकामा त्यसको सराहना गरेका छन् । यसैबीच संस्कृति, पर्यटन तथा नागरिक उडड्यनमन्त्री बद्रिप्रसाद पाण्डेले पर्यटकीय गतिविधि थप चलायमान बनाउनका लागि आन्तरिक पर्यटनलाई बढावा दिनुपर्नेमा जोड दिएका छन् । काभ्रेपलाञ्चोकको पनौतीमा सप्तलाल तथा श्रीराम स्मृति प्रतिष्ठानद्वारा आयोजित पुस्तक लोकार्पण एवं सम्मान कार्यक्रमलाई सम्बोधन गर्दै उनले सो कुरा बताएका हुन् । उनले छिमेकी देश समृद्ध हुँदा पनि त्यसको फाइदा नेपालको पर्यटन क्षेत्रलाई हुने धारणा राखेका छन् । विभिन्न जाति, चाडपर्व, भेषभुषा, खानपानका हिसावले विविधतापूणर् नेपालमा पर्यटननै विदेशी पर्यटक आकर्षित गर्ने प्रमुख माध्यम भएको उनको भनाइ थियो । उनले विश्व सम्पदामा सूचीकृतका लागि पहल गरिरहेको ऐतिहासिक एवं पुरातात्विक नगर पनौतीलाई सूचीकृतयोग्य बनाउन मन्त्रालयले सहयोग गर्ने प्रतिबद्धता जनाएका छन् । त्यसैगरी उपप्रधानमन्त्री एवम् शहरी विकास मन्त्री प्रकाशमान सिंहले वर्तमान सरकार सुधार र विकासका लागि कडा प्रयास गरिरहेको बताएका छन् । नेपाली काँग्रेस थाहा नगर कार्यसमिति, मकवानपुरले आयोजना गरेको कार्यकर्ता भेटघाट कार्यक्रममा बोल्दै उनले राजनीतिक स्थिरताको आधारमा सरकार विकास र आर्थिक समृद्धि ल्याउन काम गरिरहेको दाबी गरेका हुन् । उपप्रधानमन्त्री सिंहले पछिल्लो निर्वाचनपछि बनेको सत्ता गठबन्धन लामो समयसम्म टिक्न नसकेपछि जनतामा बढेको निराशा चिर्नका लागि वर्तमान गठबन्धन गठन भएको बताएका छन् । त्यस्तै उनले राजनीतिक स्थिरता र स्थायित्वका लागि अहिलेको सरकार बनेको पनि बताएका छन् । सो अवसरमा मन्त्री सिंहले चन्द्रागिरी चित्लाङ सडकको निर्माण कार्य अवलोकन गर्दै उक्त सडक छिट्टै सम्पन्न गर्न पहल गर्ने पनि बताएका छन् । कार्यक्रममा उनले विकासका लागि जनप्रतिनिधिको भूमिका महत्वपूणर् भए पनि संघ, प्रदेश र स्थानीय तहमा सबैको सहकार्य आवश्यक रहेको विचार राखेका छन् ।
