काठमाडौं । उपप्रधानमन्त्री एवं शहरी विकास मन्त्री प्रकाशमान सिंहले जनताको चाहना पूर्वाधार विकास भएको भन्दै विकास निर्माणमा दलहरु मिलेर काम गर्नुपर्ने बताएका छन् । शहरी विकास मन्त्रालय अन्तर्गतको सघन शहरी विकास कार्यक्रमअन्तर्गत कञ्चनपुर बेलौरी नगरपालिकामा एकीकृत शहरी विकास कार्यक्रमका विभिन्न योजना उद्घाटन गर्दै उनले यस्तो बताएका हुन् । उनले पूर्वाधार विकासका कामहरु गरेर जनतालाई सेवासुविधा दिनुपर्नेमा आफ्नो जोड रहेको बताएका छन् । उनले राजनीतिक व्यवस्था बदल्ने आन्दोलनमा सबै दलहरु मिलेको चर्चा गर्दै विकास निर्माणका काममा पनि दलबीच एकता जरुरी रहेको धारणा राखेका छन् । उनले विकासका लागि राजनीतिक स्थिरता आवश्यक पर्ने भएकैले अहिले नेपाली कांग्रेस र नेकपा एमालेसहित अरु दलहरुलाई पनि मिलाएर सरकार बनेको बताएका छन् । त्यस्तै, उपप्रधानमन्त्री सिंहले सरकारले बजेट बनाउँदा जनताको आवश्यक्ताको प्राथमिकिकरणका आाधरमा योजनाहरु बनाउने पनि बताएका छन् । संविधानले दिएका अधिकार सबैले बराबरी रुपमा उपभोग गर्न पाउनुपर्ने भन्दै उहाँले लामो संघर्षबाट प्राप्त अधिकारहरुलाई सुरक्षित गर्न आवश्यक कानूनहरु बनाउन सरकार लागिरहेको जानकारी दिएका छन् । अधिकार सँगसँगै जिम्मेवारी विर्सन नहुनेमा पनि सिंहले बताएका छन् । यसैबीच नेपाल विद्युत् प्राधिकरणका कार्यकारी निर्देशक कुलमान घिसिङलाई जिम्मेवारीबाट हटाउन नहुने पक्षमा नेपाली कांग्रेसका प्रमुख पदाधिकारी नै देखिएका छन् । कांग्रेस उपसभापति पूर्णबहादुर खड्का, महामन्त्री द्वय गगन थापा र विश्वप्रकाश शर्मा, गृहमन्त्री रमेश लेखकलगायतका नेताहरू तत्काल कुलमानलाई हटाउन नहुने पक्षमा रहेको स्रोतले बताएको छ । पछिल्लो समय ऊर्जा, जलस्रोत तथा सिँचाइ मन्त्री दीपक खड्का कुलमानलाई हटाउने पक्षमा देखिन्छन् । खड्का कांग्रेसकै मन्त्री हुन् । कुलमानले राजनीतिक पूर्वाग्रह प्रेरित भएर सरकारलाई नटेरेको भन्दै मन्त्री खड्का असन्तुष्ट छन् । अर्कातिर प्रधानमन्त्री केपी शर्मा ओली पनि कुलमानसँग विगतदेखि नै सन्तुष्ट छैनन् । माओवादी केन्द्रनिकट मानिने कुलमानले सरकारलाई असहज हुने गरी गतिविधि गरिरहेको आरोप पनि छ । त्यसैगरी खानेपानी मन्त्री प्रदिप यादवले खानेपानी संस्थानमा देखिएको बेतिथि अन्त्य गर्दै नाफामा लगेर छाड्ने प्रतिवद्धता जनाएका छन् । संस्थानको ३६ औं वार्षिकोत्सवका अवसरमा काठमाडौंमा आयोजित कार्यक्रममा मन्त्री यादवले नयाँ योजनाका साथ संस्थानमा देखिएको बेतिथि अन्त्य गर्दै घाटामा रहेको संस्थानलाई नाफामा लगेर छाड्ने प्रतिवद्धता जनाएका हुन् । उनले केहि कर्मचारीहरूले संस्थाको हित बिपरित काम गरेको भन्दै असन्तुष्टि समेत व्यक्त गरेका छन् । संस्थानलाई कार्यबहाकको भरमा धेरै दिन चलाउन नसकिने भन्दै छिटै महाप्रबन्धक नियुक्त गर्ने उनले जानकारी दिएका छन् । उनले आफू मन्त्रालयमा आएपछि खानेपानीको क्षेत्रमा धेरै सकारात्मक काम भएका कारण जनताको असन्तुष्टि अन्त्य भएको दावी गरेका छन् ।
