मुलुक धेरै अघि बढिसकेकाले तानासाही राजतन्त्र अब कहिल्यै फर्किएर नआउने दावी

काठमाडौं । प्रधानमन्त्री केपी शर्मा ओलीले जनताको संघर्षबाट भूतप्रेत भइसकेको तानासाही राजतन्त्र अब कहिल्यै फर्किएर नआउने बताएका छन्‌ । राष्ट्रिय जनसांस्कृतिक महासंघ नेपालको नवौँ राष्ट्रिय महाधिवेशनको काठमाडौंमा उद्घाटन गर्दै उनले मुलुक धेरै अघि बढिसकेकाले तानासाही राजतन्त्र अब कहिल्यै फर्किएर नआउने बताएका हुन्‌ । प्रधानमन्त्री ओलीले गणतन्त्र आइसक्दा पनि स्वतन्त्र हुन नचाहेर रैती नै हुन पाउँ भन्ने मूर्खहरूको डफ्फाले व्यवस्थाको विरोध गर्ने र जेमा पनि नकारात्मकता देख्ने गरेको उल्लेख गरेका छन्‌ । राजा हुने सपना कसैले देख्छ भने त्यो केवल सपना मात्रै हुने उनको भनाइ छ । प्रधानमन्त्री ओलीले जनताको समृद्धि, स्वतन्त्रता र शान्तिका लागि आफ्नो सृजनात्मक अभियानलाई तीव्रता दिन आग्रह गरेका छन्‌ । राजतन्त्र अब फर्कन्न भन्ने कलाकार सुरक्षा पन्तको फिल्म बहिष्कार गर्छु भन्नेहरुलाई सचेत गर्दै प्रधानमन्त्री ओलीले देश र जनताको पक्षमा राम्रा फिल्म र नाटक बनाउँदा हेर्ने दर्शकको कुनै कमी नहुने स्पष्ट पारेका छन्‌ । यसैबीच प्रधानमन्त्री केपी शर्मा ओलीसमक्ष नेकपा एकीकृत समाजवादीले मुलुकको आर्थिक, सामाजिक लगायत क्षेत्रमा सुधारका लागि मागपत्र बुझाएको छ । प्रधानमन्त्री निवास, बालुवाटारमा प्रधानमन्त्री ओलीलाई भेटेर सो पार्टीका अध्यक्ष एवं पूर्व प्रधानमन्त्री माधवकुमार नेपालसहितका पदाधिाकारीले मागपत्र बुझाएका हुन्‌ । मागपत्रमा ‘सुशासन र रोजगारी, समाजवादको तयारी’ को नाराका साथ कृषि, उद्योग, शिक्षा, स्वास्थ्य, पर्यटन, सूचना प्रविधि, पूर्वाधार, सुशासन, विदेश नीति, संविधानको पुनरावलोकनका लागि सुझाव दिइएको छ । गत चैत १५ गतेको तीनकुने घटनाका क्रममा एकीकृत समाजवादीको कार्यालयमा तोडफोड भएकाले त्यसको उचित क्षतिपूर्तिका लागि पनि अध्यक्ष नेपालले सरकारसँग माग गरेका छन्‌ । मागपत्र बुझ्दै प्रधानमन्त्री ओलीले आगामी आर्थिक वर्षको नेपाल सरकारको नीति तथा कार्यक्रम र बजेटको पूर्व सन्ध्यामा सुझावहरु प्राप्त भएकामा धन्यवाद दिँदै नीति तथा कार्यक्रमको अन्तिम तयारी भइसकेकाले बजेट निर्माणका क्रममा यी सुझावलाई समेट्ने कोशिश गर्ने विश्वास दिलाएका छन्‌ । प्रधानमन्त्री ओलीले प्रतिगामी र अतिवादी तत्वहरुका अवाञ्छित क्रियाकलाप भइरहेको सन्दर्भमा त्यस्ता क्रियाकलापको विरोध हुनुपर्नेमा जोड दिएका छन्‌ । त्यसैगरी जनमत पार्टीका अध्यक्ष सिके राउतले नागरिक उन्मुक्ति पार्टी(नाउपा)का संरक्षक रेशम चौधरीको पक्राउ कर्मचारीको त्रुटि मात्र नभई ठुलो षडयन्त्र रहेको दाबी गरेका छन्‌ । डिल्लीबजार कारागारबाट रेशम छुटेपछि पत्रकारसँग कुरा गर्दै अध्यक्ष राउतले यस्तो बताएका हुन्‌ । दुई पार्टी एकीकरण घोषणा हुनु अगावै पक्राउ पर्नुले त्यो कुरा पुष्टि हुने उनले बताएका छन्‌ । एकीकरण भए रेसमलाई जन्मकैद हुनसक्छ भन्ने चुनौती पनि यो घटनाबाट देखिएको अध्यक्ष राउतले दाबी गरेका छन्‌ ।