काठमाडौं । प्रधानमन्त्री केपी शर्मा ओलीले धर्तीमा बढ्दो तापमान र प्रदूषणका कारण मानवीय जीवन र पृथ्वीको भविष्य रक्षार्थ सबै मिलेर काम गर्नुपर्नेमा जोड दिएका छन् । सगरमाथा संवादको पूर्व सन्ध्यामा डा गोपालकृष्ण सिवाकोटीद्वारा लिखित ‘क्याइमेट कालामिटीः जष्टिस फर लस एण्ड ड्यामेज’ पुस्तकको लोकार्पण गर्दै प्रधानमन्त्री ओलीले हाम्रा भविष्यका सन्तति सुरक्षित र सम्मानित होउन् भनेर काम गर्नुपर्नेमा जोड दिएका छन् । प्रधानमन्त्री ओलीले सगरमाथा संवादका क्रममा जलवायु न्यायसम्बन्धी अध्ययन र प्रतिवेदनका सारलाई आफूले सम्बोधनमा समावेश गर्ने बताएका छन् । त्यसैगरी सञ्चार तथा सूचना प्रविधिमन्त्री पृथ्बीसुब्बा गुरुङले दुई चार दिनभित्रै गभर्नर नियुक्ति हुने बताएका छन् । मन्त्रिपरिषद् बैठकको निर्णय सुनाउँदै सरकारका प्रवक्तासमेत रहेका गुरुङले नियुक्तिमा अब तलमाथि नहुने बताएका छन् । नेपाल राष्ट्र बैंकको गभर्नर नियुक्तिमा ढिलाइ भएपछि सरकारको चर्को आलोचना भइरहेको छ । सरकारले बजेट ल्याउन तयारी गरिरहँदा पनि महिना दिन बढी बितिसक्दा पनि गभर्नर नियुक्ति नगरेको भन्दै सरकारको आलोचना भइरहेको हो । त्यसैगरी नेपाली कांग्रेसका सांसद प्रकाशशरण महतले अगामी आर्थिक वर्षको विनियोजन विधेयकका सिद्धान्त र प्राथमिकताहरू उपयुक्त दिशातर्फ उन्मुख रहेको बताउँदै कार्यान्वयनमा जोड दिनुपर्ने बताएका छन् । प्रतिनिधिसभाको बैठकमा विनियोजन विधेयकका सिद्धान्त र प्राथमिकता माथिको छलफलमा भाग लिँदै सांसद महतले यस्तो बताएका हुन् । आगामी आर्थिक वर्षको बजेटले विनियोजन विधेयकका सिद्धान्त र प्राथमिकताहरूलाई समेटेर ठोस प्रस्तावहरू ल्याउन सक्नुपर्ने बताएका छन् । उनले बढ्दो लोकप्रियतावादबाट माथि उठ्न जरुरी रहेको बताएका छन् । उनले दलका शीर्ष नेतृत्व नै लोकप्रियताका लागि प्रतिस्पर्धामा उत्रिँदा मुलुकमा अनावश्यक अपेक्षा सिर्जना गरेको बताएका छन् । उनले बजेट निर्माणका क्रममा उपलब्ध साधनस्रोतको प्रभावकारी उपयोग र प्राथमिकीकरणमा जोड दिनुपर्ने धारणा व्यक्त गरेका छन् ।
