काठमाडौं । प्रतिनिधिसभाको बैठकमा उपलब्ध आकस्मिक समयमा सांसद डा. सुनीलकुमार शर्माले देशभरको सरकारी अस्पतालको सेवा प्रभावित हुँदा सेवाग्राही मारमा परेकोबारे सभामुखमार्फत सरकारको ध्यानाकर्षण गराएका छन् । उपभोक्ता अदालत सम्बन्धी विषयमा असन्तुष्टि जनाउँदै नेपाल चिकित्सक संघले घोषणा गरेको आन्दोलनले बहिरंग (ओपिडी) सेवा बन्द हुँदा बिरामीहरू मर्कामा परेको उनको भनाइ छ । आन्दोलनरत चिकित्सकहरूको मागप्रति गम्भीर हुन सरकारसँग आग्रह गर्दै सांसद डा. शर्माले चिकित्सकको दरबन्दी बढाउनसमेत माग गरेका छन् । त्यसैगरी रास्वपा प्रमुख सचेतक सन्तोष परियारले कुलिङ अफ पिरियड प्रकरणको छानबिन गर्न गठित समितिको संयोजक कांग्रेसलाई दिँदा प्रश्न उठ्न सक्ने बताएका छन् । संसद् भवन नयाँ बानेश्वरमा सञ्चारकर्मीसँग कुरा गर्दै परियारले कांग्रेसकै सांसद रहेको सभापतिमाथि छानबिन गर्न बनेको समितिको संयोजक कांग्रेसलाई दिँदा प्रश्न उठ्न सक्ने तर्फ सभामुखको समेत ध्यानाकर्षण गराएको बताएका हुन् । छानबिन समितिको नेतृत्व नगर्न रास्वपाले दिएको सुझावलाई गम्भीर रूपमा नलिएको उनले बताएका छन् । परियारले रास्वपा निर्णायक शक्ति नभएकाले गलत कुराहरूलाई रोक्न नसकिएको धारणा राखेका छन् । उनले कुलिङ अफ पिरियड प्रकरणको छानबिनका लागि राज्य व्यवस्था समितिका सभापतिले राजीनामा दिनुपर्ने सुझाव समेत कार्यव्यवस्था परामर्श समितिमा दिएको जानकारी दिएका छन् । परियारले छानबिन समितिको नेतृत्वको विषयमा असहमति हुँदाहुँदै पनि संसदमा भएका गलत कामलाई रोक्नका लागि पार्टीबाट छानबिन समितिमा सदस्य पठाएको बताएका छन् । उनले सार्वभौम संसद्ले बनाएको कानुनलाई कुनै अमुक व्यक्ति वा संस्थाबाट प्रभावित भएर परिवर्तन गर्ने कुरा अव उपरान्त कहिले पनि नहुने गरी विशेष छानबिन समितिले काम गर्ने विश्वास व्यक्त गरेका छन् । यसैबीच नेकपा (माओवादी केन्द्र) ले नेकपा (एमाले) सँग एकताको चर्चा नचलेको स्पष्ट पारेको छ । माओवादीले एमालेलाई पार्टी एकताको प्रस्ताव गरेको समाचार बाहिएको प्रति गम्भीर ध्यानाकर्षण भएको उल्लेख गर्दै माओवादीले त्यस्तो नभएको जनाएको हो । ‘एमाले बाहेकका अन्य कम्युनिष्ट पार्टी र समाजवादी मोर्चामा रहेका घटकहरूसँग एकताको बारेमा छलफल भइरहे पनि एमालेसँग एकताको चर्चा पनि चलेको छैन,’ माओवादी उपाध्यक्ष तथा प्रवक्ता अग्निप्रसाद सापकोटाद्वारा जारी विज्ञप्तिमा भनिएको छ । विज्ञप्तिमा एमालेसँग पार्टी एकता गर्ने नीति र सोच नरहेको पनि उल्लेख छ । यसअघि माओवादी वरिष्ठ उपाध्यक्ष नारायणकाजी श्रेष्ठले भर्खरै एमालेको सक्रिय राजनीतिमा फर्किएकी पूर्वराष्ट्रपति विद्या भण्डारीलाई भेटेर पार्टी एकताको प्रस्ताव गरेको समाचारहरू प्रकाशित भएका थिए ।
