काठमाडौं । राष्ट्रिय स्वतन्त्र पार्टीकी सांसद सोविता गौतमले दुई ठुला दलले आफ्नो राजनीतिक स्वार्थ पूर्तिका लागि उपसभामुख इन्दिरा रानालाई झुट्टा आरोप लगाएर हटाउन खोजेको बताएकी छन् । हरितालिका तिजका अवसरमा रास्वपाद्वारा आयोजित कार्यक्रमलाई सम्बोधन गर्दै सांसद गौतमले कारागारमा रहेका व्यक्तिका बच्चाहरूको पालनपोषणमा आफ्नो जीवन समर्पण गरेकी रानामाथि संवैधानिक परिषद्को अंकगणित र भागबन्डा मिलाउने नाममा कांग्रेस–एमालेले आचरणको कुरा उठाएर हटाउन खोजिएको र यसको जवाफ जनताले खोज्ने बताइन् । संवैधानिक परिषदमा आफू अनुकूलका मान्छे नियुक्तिका लागि यो प्रपञ्च रचिएको उनको दाबी छ । सांसद गौतमले रास्वपा सभापति रवि लामिछानेलाई पनि राजनीतिक प्रतिशोध साधेर मुद्दामाथि मुद्दा र जेलमा राखिएको बताइन् । यसैबीच नेकपा एमालेको यही भदौमा हुन लागेको विधान महाधिवेशनको नारा तय भएको छ । भदौ २० देखि २२ गते सम्म हुन लागेको दोस्रो विधान महाधिवेशनका लागि एमालेले नारा तय गरेको हो । एमाले प्रचार विभाग प्रमुख राजेन्द्र गौतमका अनुसार विधान महाधिवेशनको नारा, ‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य’ तय भएको छ । ललितपुरको गोदावरीमा हुने विधान महाधिवेशनमा देशभरबाट दुई हजार १२८ जना प्रतिनिधि र २६४ जना आयोजक गरी कुल दुई हजार ३९२ जनाको सहभागिता रहने एमालेले जनाएको छ । त्यसैगरी उपप्रधानमन्त्री तथा अर्थमन्त्री विष्णु पौडेलले विश्वभरी छरिएर रहेका नेपालीहरूलाई नेपालमा आएर लगानी गर्न आग्रह गरेका छन् । एसोसिएसन अफ नेपाली ओरिजियन (एएनओ) नेपाल च्याप्टरको प्रथम अधिवेशनको उद्घाटन गर्दै विभिन्न कारणले विदेशिएका र विदेशमा व्यापार गरिरहेका नेपालीहरूलाई नेपालमा आएर लगानी गर्न आग्रह गरेका छन् । सम्मेलनको उद्घाटन सत्रमा सांस्कृतिक राष्ट्रियतालाई जोड्न पनि एएनओको भूमिका रहेको भन्दै अर्थमन्त्री पौडेलले यस्ता कार्यक्रमहरु आदानप्रदान हुन आवश्यक रहेको समेत बताएका थिए । एएनओका केन्द्रीय अध्यक्ष डिल्ली अधिकारीले नेपालीहरूको सुनौलो भविष्य निर्माणमा सहयोग पुगोस् भन्ने उद्देश्यले विश्वका ३२ वटा देशमा रहेका नेपालीहरूको सहभागितामा गत वर्ष थाइल्याण्डमा संस्था गठन गरेको जानकारी दिएका छन् । कार्यक्रममा महासचिव चूडामणि भट्टराईले एनएओ गठनको उद्देश्यबारे आफ्नो धारणा राखेका थिए । कार्यक्रमको सञ्चालन गर्दै नेपाल टेलिभिजन सञ्चालक समितिमा सदस्य फूलमान बलले पनि एएनओ गठनको उद्देश्यबारे जानकारी गराएका थिए । सम्मेलनले विश्वभरी छरिएर रहेका नेपालीहरूलाई एक सूत्रमा बाँध्ने अभियान अन्तर्गत गठन भएको एसोसिएसन अफ नेपाली ओरिजियन (एनओ)को नेपाल च्याप्टर गठन भएको छ ।
