काठमाडौं । प्रधानमन्त्री सुशीला कार्कीले विदेशस्थित नेपाली दूतावासका राजदूतहरूसँग छलफल गरेकी छन् । परराष्ट्र मन्त्रालयसमेत सम्हालिरहेकी प्रधानमन्त्री कार्कीले परराष्ट्र मन्त्रालयमा विदेशीस्थित नेपाली दूतावासका राजदूतहरूसँग छलफल गरेकी हुन् । जेनजी आन्दोलनपछि विकसित घटना क्रमका सम्बन्धमा उनले नेपाली राजदूतहरूसँग भर्चुअल संवाद गरेकी हुन् । जेनजी आन्दोलनपछि धेरै देशहरूले नेपाली नागरिकलाई भिसालगायत विषयमा कडाइ गरेको विषयमा पनि उनले राजदूतहरूसँग चासो व्यक्त गरेको परराष्ट्र मन्त्रालय स्रोतले जानकारी दिएको छ । संवाद अझै जारी रहेको छ । भर्चुअल संवादमा मुख्य सचिव एकनारायण अर्याल र परराष्ट्र सचिव अमृतबहादुर राई पनि सहभागी छन् । यसैबीच निर्वाचन आयोगले फागुन २१ गते तोकिएको प्रतिनिधिसभा निर्वाचनका लागि दलहरूलाई छलफलमा बोलाएको छ । आयोगले असोज ३० गते दलहरूसँग छलफलको मिति तय गर्दै छलफलका लागि बोलाएको हो । निर्वाचन गर्ने म्यान्डेट प्राप्त सरकार दलहरूसँग संवादविहीनताका अवस्थामा रहेका बेला आयोगले भने छलफलको मिति तय गरेको छ । आयोग स्रोतका अनुसार २९ वटा दललाई पत्र काटेर पठाइएको छ । जेन–जी आन्दोलनपछि अन्तरिम सरकारको प्रधानमन्त्री बनेकी सुशीला कार्कीले प्रतिनिधिसभा विघटन गरेर फागुन २१ गते अर्को निर्वाचनको मिति तय गरेकी थिइन् । यस्तै निर्वाचन आयोगले पनि यसै साता निर्वाचन कार्य तालिका ल्याइसकेको छ । यस्तोमा सरकार र आयोग दुवैले निर्वाचनको प्रमुख सरोकारवाला मानिने दलसँग संवाद नगर्दा निर्वाचन हुने/नहुने अनेक किसिमका आशंका भइरहेका छन् । यस्तोमा पहिला आयोगले नै दलहरूसँग छलफलको अग्रसरता लिएको छ । सबै दललाई एकै पटक बोलाएर छलफल गर्न असुविधा हुनसक्ने भन्दै आयोगले पहिलो चरणमा विघटित प्रतिनिधिसभा, प्रदेशसभा र स्थानीय तहमा प्रतिनिधित्व गरेका दलहरूलाई बोलाएको छ । त्यसैगरी पोखराको लिची बगानको जग्गा घोटाला प्रकरणमा दुई पूर्वमन्त्रीसहित ७ जनाविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले विशेष अदालतमा पूर्वमन्त्रीद्वय राजकुमार गुप्ता र रञ्जिता श्रेष्ठसहित ७ जनाविरुद्ध भ्रष्टाचार मुद्दा दायर गरेको हो । उक्त मुद्दामा ७८ लाख रुपियाँ बिगो दाबी गरिएको छ । गुप्ताले बिचौलियाहरूसँग घुस डिल गरेको आडियो सार्वजनिक भएपछि अख्तियारले अनुसन्धान अघि बढाएको थियो । यही प्रकरणमा एमालेकै अर्का पूर्वमन्त्री बलराम अधिकारीको नामसमेत लिइएको छ । अधिकारीको संलग्नता अहिले स्पष्ट नभइसकेकाले अनुसन्धान जारी रहेको र त्यो सकिएपछि पूरक अभियोग लैजान सकिने बताइएको छ ।
