काठमाडौं । गृहमन्त्री ओमप्रकाश अर्यालले भदौ २३ र २४ गतेको घटनामा दोषी देखिएकालाई कारबाही गर्न गठित जाँचबुझ आयोगमा कोही बयान दिन नगए सरकारले आयोगलाई सहयोग गरेर बयान दिन लगाउने बताएका छन् । जेन–जी २.० समूहसँग गृहमन्त्रालयमा भएको विशेष भेटघाटमा उनले कोही बयानका लागि नगए सरकारले आयोगलाई सहयोग गरेर बयान दिन लगाउने बताएका हुन् । तत्कालिन प्रधानमन्त्री एवं नेपाल कम्युनिष्ट पार्टी एमालेका अध्यक्ष केपी शर्मा ओलीले यसअघि नै सार्वजनिक रुपमा जाँचबुझ आयोगमा बयान दिन नजाने सार्वजनिक रुपमा भनिसकेका छन् । जाँचबुझ आयोगलाई आफूले नचिनेको भन्दै उनले कसैले बयानका लागि बोलाउँदैमा आफू लुरुलुरु बयान दिन नजाने सार्वजनिक गरिसकेका छन् । आफूले प्रहरी प्रशासनलाई गोली हान्न अधिकार नदिएकोले आफू दोषि नभएको भन्दै आफू किन बयान दिन जाने भन्दै उनले प्रश्न गर्दै आएका छन् । यसैबीच आसन्न प्रतिनिधिसभा सदस्य निर्वाचन शान्तिपूर्ण, भयरहित र स्वतन्त्र वातावरणमा सम्पन्न गर्न गृहमन्त्री ओमप्रकाश अर्यालको सक्रियतामा तीनवटै सुरक्षा निकायका लागि आवश्यक सवारी साधनहरूको खरिद अनुमति प्राप्त भई प्रक्रियासमेत अघि बढेको छ । गृह मन्त्रालयको सक्रियतापछि अर्थ मन्त्रालयले पनि हालैको जेन–जी प्रदर्शनपछि पूर्ण रूपले आगजनीमा परेर ध्वस्त भएका अत्यावश्यक सवारी साधनहरूको खरिद प्रक्रिया अन्तिम चरणमा पुगेको छ । चुनावको वातावरण निर्माण गर्नका लागि पनि तीनवटै सुरक्षा निकायका लागि अत्यावश्यक सवारी साधन खरिद हुन जरुरी भएकाले चुनावअगाडि नै सवारी साधनहरूको खरिद भइसक्ने विश्वास रहेको गृह मन्त्रालयले जनाएको छ । गृह मन्त्रालयको तथ्यांकअनुसार अर्थ मन्त्रालयबाट नेपाल प्रहरीलाई नियमित बजेटबाट १५६ वटा सवारीसाधनका लागि रु. ३५ करोड ११ लाख र थप १०६ वटा सवारीसाधन खरिदका लागि ४५ करोड ३० लाख थप स्रोत सहमति प्राप्त भइसकेको छ । यस आर्थिक वर्षमा नेपाल प्रहरीले कुल रु. ८० करोड ४१ लाख रुपैयाँको विभिन्न सवारी साधन खरिद गर्ने तयारी रहेको छ । यी सवारीसाधन खरिदका लागि गृहले अर्थबाट असोज २४ गते खरिद अनुमति पाई आवश्यक प्रक्रियामा गइसकेको छ । त्यसैगरी नवघोषित प्रगतिशील लोकतान्त्रिक पार्टीका नेता तथा पूर्वप्रधानमन्त्री बाबुराम भट्टराईले जेनजी आन्दोलनको मर्म अनुसार नयाँ पार्टी गठन गरिएको बताएका छन् । काठमाडौंमा प्रगतिशील लोकतान्त्रिक पार्टी घोषणा कार्यक्रममा भट्टराईले जेनजी युवाहरूको मर्म र भावना अनुसार जेनजी विद्रोहको उपज प्रगतिशील लोकतान्त्रिक पार्टी बनेको बताएका हुन् । उनले जनेजी युवाहरूको चाहना अनुसार राजनीतिक पुनर्संरचना आवश्यक रहेको भन्दै त्यसो हुन नसके नेपाल विश्वसँगै अघि बढ्न नसक्ने धारणा राखेका छन् । प्रगतिशील लोकतान्त्रिक पार्टी जेनजी पुस्तासँग जोडिएको पार्टी भएकाले युवाहरुले नै पार्टीको नेतृत्व लिनुपर्ने उनले बताएका छन् । धरापमा परेको लोकतन्त्र र जटिल भूराजनीतिक अवस्थाबाट देशलाई अघि बढाउनका लागि वैकल्पिक शक्तिहरू एक ठाउँमा आउनुपर्ने उनले बताएका छन् ।
