काठमाडौं । आसन्न प्रतिनिधिसभा निर्वाचनमा नेपाली कांग्रेसले देशभर १६२ जनालाई उम्मेदवार बनाएको छ । यो उम्मेदवारी संख्यामा १५२ जना पुरुष छन् भने महिलाको संख्या १० मात्र देखिएको छ । लैंगिक समानताका विषय जोडतोडले उठ्ने बेलामा उम्मेदवार चयनमा भने त्यस्तो पाइएको छैन । झापा र काठमाडौंमा दुई/दुई जना, सिराहा, सिन्धुली, मकवानपुर, चितवन, रुकुमपूर्व र दैलेखमा एक एक जना उम्मेदवार उठाएको छ । नेपाली कांग्रेसले १० जना महिलालाई उम्मेदवार बनाएको छ । ती मध्ये झापा–२ सरिता प्रसाईं, झापा–५बाट मन्धरा चिमरिया उम्मेदवारी दर्ता गरेका छन् । त्यस्तै सिराहा–४बाट चन्द्रकलाकुमारी यादव, सिन्धुली–२बाट सुशीला थिङ, मकवानपुर–१बाट महालक्ष्मी उपाध्याय ‘डिना’ले उम्मेदवारी दर्ता गराएका छन् । काठमाडौंबाट पनि दुई जना उम्मेदवार चयन भएका छन् । काठमाडौं–८ बाट सपना राजभण्डारी, काठमाडौं–९ बाट नानु बास्तोलाको उम्मेदवारी परेको छ । त्यस्तै चितवन–२बाट मिनाकुमारी खरेल, रुकुमपूर्वबाट कुशुमदेवी थापा मगर, दैलेख–१बाट वासना थापाको उम्मेदवारी परेको छ । यसैबीच नेपाली कांग्रेसका नेता डा. शेखर कोइरालाले मोरङ निर्वाचन क्षेत्र नं–६ बाट प्रतिनिधिसभा सदस्यका लागि आफ्नो उमेदवारी दर्ता गराउनुभएको छ । निर्धारित समयभित्र निर्वाचन कार्यालय पुगेर उहाँले उमेदवारी दर्ता गराउनुभएको हो । पार्टीको तर्फबाट उम्मेदवार बनेका डा. कोइरालाले मोरङ–६ मा संगठन मजबुत रहेको बताउँदै विजयी हुने विश्वास व्यक्त गर्नुभएको छ । त्यसैगरी प्रतिनिधिसभा निर्वाचनको प्रत्यक्षतर्फको मनोनयन दर्ता देशभरिका निर्वाचन क्षेत्रमा चलिरहेको छ । १६५ क्षेत्रमा उत्साहका साथ मनोनयन दर्ता भइरहेको निर्वाचन आयोगले जनाएको छ । यसपटकको निर्वाचनमा नयाँ दलहरू पनि सशक्त रूपमा उदाएकाले निर्वाचन थप रोचक बनेको छ । निर्वाचन आयोगले सबै दललाई समय तोकेर उम्मेदवारी दर्ताको तालिका मिलाएको छ । पूर्वप्रधानमन्त्री चारजना यसपटक निर्वाचनमा प्रतिस्पर्धा गर्दै छन् । केपी ओली झापा ५, पुष्पकमल दाहाल प्रचण्ड रुकुम पूर्व, माधवकुमार नेपाल रौतहट १ र बाबुराम भट्टराई गोरखा २ बाट प्रतिस्पर्धा गर्दै छन् । कांग्रेसका नेता शेरबहादुर देउवाले भने चुनाव नलड्ने भएका छन् ।
