काठमाडौं । नेपाली कांग्रेसले आगामी निर्वाचनका लागि आफ्नो चुनावी अभियान मधेश प्रदेशबाट औपचारिक रूपमा सुरु गर्ने भएको छ । माघ १६ गते जनकपुरमा आयोजना हुने प्रदेशस्तरीय सभामार्फत कांग्रेसले चुनावी गतिविधिलाई तीव्र बनाउने तयारी गरेको हो । जनकपुरको सभामा पार्टी सभापति गगन थापा, उपसभापति विश्वप्रकाश शर्मा लगायत शीर्ष नेताहरूको उपस्थिति रहने भएको छ । सभालाई उनीहरूले सम्बोधन गर्ने कार्यक्रम तय भएको छ । कांग्रेसले उपसभापति शर्मालाई केन्द्रीय स्तरको चुनावी प्रचार–प्रसार समितिको संयोजकको जिम्मेवारी समेत दिएको छ । जनकपुरमा हुने सभाको समन्वय केन्द्रीय तहबाट उपसभापति शर्माले गर्ने भएका छन् । मधेश प्रदेशका प्रचार संयोजक नितेशकुमार गुप्ताका अनुसार सभालाई प्रभावकारी बनाउन संगठनात्मक तयारी तीव्र पारिएको छ । कांग्रेस सभापति गगन थापा सर्लाही–४ बाट उम्मेदवार बनेका छन् । यस पटकको निर्वाचनलाई लक्षित गर्दै प्रमुख राजनीतिक दलहरूले मधेश प्रदेशलाई केन्द्रमा राखेर आफ्ना गतिविधि विस्तार गरिरहेको बुझिएको छ । यसैबीच आसन्न प्रतिनिधिसभा सदस्य निर्वाचनका लागि म्याग्दीमा स्वतन्त्र उम्मेदवार बनेका निवर्तमान शिक्षामन्त्री महावीर पुनलाई उज्यालो पार्टी नेपालले समर्थन गर्ने घोषणा गरेको छ । पार्टीका प्रवक्ता डा. राजु थापाले विज्ञप्ति जारी गर्दै पुनलाई समर्थन गरिएको जानकारी दिएका हुन् । यसअघि राष्ट्रिय स्वतन्त्र पार्टीसहित केही अन्य दलहरूले पनि आफ्ना उम्मेदवार निष्क्रिय बनाउँदै पुनलाई समर्थन जनाइसकेका छन् । म्याग्दीको अन्नपूर्ण गाउँपालिका–८ नाङ्गी गाउँमा जन्मिएका पुन राष्ट्रिय आविष्कार केन्द्रका अध्यक्षसमेत हुन् । उनले अन्तरिम सरकारको शिक्षा, विज्ञान तथा प्रविधिमन्त्री पदबाट राजीनामा दिएर निर्वाचनमा उम्मेदवारी दिएका हुन् । उनको फरक र रोचक प्रचार शैलीका कारण सामाजिक सञ्जालमा पनि व्यापक चर्चा भइरहेको छ । त्यसैगरी शिक्षामन्त्रीबाट राजीनामा दिएर म्यादीको उम्मेदवार बनेका महाविर पुनले चुनावी गतिविधि बढाउन थालेका छन् । उनले म्याग्दीमा पत्रकार सम्मेलन गरेका छन् । साढे ९ बजे पत्रकार सम्मेलन भन्दै सामाजिक सञ्जालबाट सूचना सार्वजनिक गरेका पुनले समयमा पत्रकार नआएको भन्दै फेसबुकबाटै लाइभ गरेका थिए । आफूले हल्लीखल्ली गर्न थालेपछि सबै भेला हुन थालेको उनले बताएका छन् । सोही क्रममा पुनसँग चिनजान गर्दै एक शिक्षकले तपाईंले ल्याउँछु भनेको ऐन किन आएन भन्ने प्रश्न गरेका थिए । महाविरले ठट्यौली पारामा भने, ‘अब म प्रधानमन्त्री बनेपछि आउँछ ।’ उनको जवाफ यतिमा मात्र सकिएन । केहीबेरमै उनले सबैतिर फर्किएर भने, ‘यहाँ अघि एक मित्रले तपाईंले ल्याउँछु भनेको शिक्षा ऐन किन नल्याएको भनेर सोध्नुभयो । त्यो ऐन ल्याउन सकेको भए किन म यहाँ उम्मेदवार भएर आउनुपर्थ्यो । ऐन आएको भए म उतै बसेर मन्त्री नै खान्थेँ । ऐन नआउने भएपछि सांसद बन्न यता आको ।’ कार्यक्रमस्थलमा पुनलाई तपाईंको ‘सिम्पल लिभिङ हाइथिङकिङ’वाला सोच राम्रो छ भन्दा उनी मुस्कुराएका थिए । तर अपेक्षाकृत उथलपुथल गर्न सक्नुभएन भन्ने प्रश्नले पुनलाई गम्भीर बनाएको थियो ।
