काठमाडौं । राष्ट्रिय प्रहरी प्रशिक्षण प्रतिष्ठानमा सञ्चालित प्रहरी निरीक्षक आधारभूत तालिम १–१८३औँ समूह (एन्म्एक् ज्ञद्धतज) को दीक्षान्त समारोह प्रधानमन्त्री सुशीला कार्कीको प्रमुख आतिथ्यतामा विशेष समारोहबीच सम्पन्न भएको छ । समारोहलाई सम्बोधन गर्दै प्रधानमन्त्री कार्कीले उत्कृष्ट प्रशिक्षार्थी प्रहरी निरीक्षकहरूलाई पुरस्कार वितरण गर्दै दीक्षित अधिकृतहरूलाई हार्दिक बधाई तथा व्यावसायिक सफलताको शुभकामना व्यक्त गरिन् । उनले परम्परागत अपराधसँगै साइबर अपराध, संगठित अपराध, वित्तीय अपराध, बहुदेशीय अपराध र सामाजिक द्वन्द्वका नयाँ आयामहरू देखापरेको वर्तमान सन्दर्भमा प्रहरीको भूमिका केवल आदेश पालनामा सीमित नरही विश्लेषक र समाधानकर्ताको रूपमा विकसित हुनुपर्नेमा जोड दिइन् । प्रधानमन्त्री कार्कीले निष्पक्ष र विश्वसनीय वातावरणमा निर्वाचन सुनिश्चित गर्नु राज्यको दायित्व भएको उल्लेख गर्दै यस दायित्वमा नेपाल प्रहरीको भूमिका अत्यन्त संवेदनशील रहने बताइन् । कुनै पनि राजनीतिक प्रभाव र पूर्वाग्रहबाटमाथि उठेर कानूनको मर्मअनुसार आफ्नो कर्तव्य निर्वाह गर्न सबै प्रहरी कर्मचारीलाई निर्देशन दिएकी छन् । सोही समारोहमा गृहमन्त्री ओमप्रकाश अर्यालले दीक्षित प्रहरी अधिकृतहरू केवल निलो बर्दीधारी मात्र नभई राज्यका प्रतिनिधि, कानूनका संरक्षक र जनविश्वासका वाहक भएको उल्लेख गर्दै सोही अनुरूप जिम्मेवारी निर्वाह गर्न निर्देशन दिएका छन् । कार्यक्रममा प्रहरी महानिरीक्षक दानबहादुर कार्कीले धन्यवाद ज्ञापन गर्दै दीक्षित प्रहरी निरीक्षकहरूलाई बधाई दिँदै गरिमामय र नागरिक सेवामा समर्पित नेपाल प्रहरी संगठनमा स्वागत गरेका छन् । उनले राष्ट्र र नागरिक सेवालाई जीवनको लक्ष्य ठानी बफादार र सच्चा प्रहरी अधिकृतको रूपमा आफूलाई स्थापित गर्न दीक्षित अधिकृतहरू सफल हुने विश्वास व्यक्त गरेका छन् । यसैबीच नेपाली कांग्रेसका उपसभापति विश्वप्रकाश शर्माले विघटित प्रतिनिधि सभा पुनर्स्थापना नहुने दाबी गरेका छन् । झापा–२ अन्तर्गत बिर्तामोडमा आयोजित पार्टी भेलालाई सम्बोधन गर्दै उनले फागुन २१ गते नै निर्वाचन हुने दाबी गर्दै त्यसका लागि तयारीमा जुट्न पार्टीपंक्तिलाई निर्देशन दिएका छन् । उनले संसद् पुनर्स्थापना हुने विषयमा कुनै अन्योल नराख्न आग्रह गर्दै सर्वोच्च अदालतमा विचाराधीन मुद्दाको समयसीमालाई आधार मानेर निर्वाचन टर्ने सम्भावना नरहेको बताएका छन् । उनका अनुसार अब बाँकी रहेको समय अदालतका लागि पर्याप्त नहुने भएकाले फागुन २१ मै निर्वाचन हुने निश्चित रहेको बताएका छन् । अदालतको फैसला जे आए पनि स्वीकार गर्नुपर्छ, तर फागुन २१ मा चुनाव हुन्छ भन्नेमा कुनै शंका गर्नु नपर्ने उनको भनाइ छ । शर्माले केही समय पार्टीभित्र द्वन्द्व देखिए पनि विशेष महाधिवेशनपछि नेपाली कांग्रेस एकताबद्ध भएर निर्वाचनमा होमिएको जिकिर गरेका छन् । उनले पार्टीपंक्तिलाई निर्वाचन केन्द्रित हुन आग्रह गर्दै फागुन २१ अगाडिसम्म कुनै विवाद वा बहसमा नजान अनुरोध गरेका छन् । उनका अनुसार यदि कसैलाई छलफल वा बहस गर्नुपर्ने भए फागुन २१ गतेको निर्वाचन सकिएपछि वा फागुन २२ गतेदेखि गर्न सकिने बताएका छन् । त्यसैगरी राष्ट्रिय सभाले तीन वटा अध्यादेश स्वीकृत गरेको छ । उक्त सभाले निर्वाचनसम्बन्धी दुईसहित तीन वटा अध्यादेश स्वीकृत गरेको हो । मतदाता नामावली ऐन, २०७३ लाई संशोधन गर्न बनेको अध्यादेश २०८२, प्रतिनिधिसभा सदस्य निर्वाचन (पहिलो संशोधन) अध्यादेश २०८२ र नेपाल विशेष सेवा ऐन (दोस्रो संशोधन) अध्यादेश २०८२ राष्ट्रिय सभाले स्वीकृत गरेको हो । गृहमन्त्री ओमप्रकाश अर्यालले तीन वटै अध्यादेश स्वीकृत गर्न प्रस्ताव पेश गरेकोमा बैठकले सर्वसम्मत पारित गरेको हो ।
