काठमाडौं । परराष्ट्र मन्त्रालयले इरानमाथि इजरायली हमलापछि मध्यपूर्व क्षेत्रमा विकसित हुँदै गएको अवस्थाप्रति गम्भीर ध्यानाकर्षण भएको जनाएको छ । मन्त्रालयले विशेषगरी इरान र इजरायलमा बसोबास गरिरहेका नेपाली नागरिकलाई उच्च सतर्कता अपनाउन आग्रह गरेको छ । परराष्ट्र मन्त्रालयले सूचना जारी गर्दै इजरायल र इरानमा रहेका नेपालीहरूलाई सम्बन्धित देशका आधिकारिक निकायले जारी गरेका सुरक्षा निर्देशन तथा परामर्शहरू कडाइका साथ पालना गर्न अनुरोध गरेको हो । सूचनामा सकेसम्म घरभित्रै बस्न, अत्यन्त सतर्क रहन, आवश्यक सावधानी अपनाउन तथा आफ्नो बसोबास क्षेत्रका नेपाली समुदायसँग नियमित सम्पर्कमा रहन सुझाव दिइएको छ । साथै, सम्बन्धित देशका निकायबाट पूर्वस्वीकृति नलिई अनावश्यक यात्रा नगर्न पनि आग्रह गरिएको छ । परराष्ट्र मन्त्रालयले नेपाली नागरिकलाई काठमाडौंस्थित मन्त्रालय, तेल अविवस्थित नेपाली राजदूतावास र दोहास्थित नेपाली दूतावाससँग नियमित सम्पर्कमा रहन पनि अनुरोध गरेको छ । इजरायल वा इरान भ्रमण गर्ने योजना बनाएका नेपाली नागरिकलाई हालको अवस्था सामान्य नहुँदासम्म यात्रा स्थगित गर्न पनि परराष्ट्रको सूचनामा उल्लेख गरिएको छ । अन्य मध्यपूर्वी देशहरूमा बसोबास तथा कार्यरत नेपाली नागरिकलाई पनि त्यहाँका सम्बन्धित निकायले जारी गरेका सुरक्षा सल्लाहहरू पालना गर्दै विकसित घटनाक्रमबारे निरन्तर जानकारी राख्न परराष्ट्रले आग्रह गरेको छ । यसैबीच नेपाली कांग्रेसका उपसभापति विश्वप्रकाश शर्माले सुशासन स्थापना गर्न पहिला शीर्ष नेताकै सम्पत्ति छानबिन सुरु हुने बताएका छन् । गुल्मीमा आयोजित चुनावी सभालाई सम्बोधन गर्दै उपसभापति शर्माले पहिला सभापति गगन थापा र पूर्व सभापति शेरबहादुर देउवाको सम्पत्ति छानबिन गरेर शासनको सुधारको थालनी गरिने बताएका हुन् । साथै उनले कर्मचारी प्रशासनको मनोबल खस्किएको उल्लेख गर्दै इमानदार कर्मचारीलाई काम गर्ने वातावरण बनाइने प्रतिबद्धता जनाएका छन् । कांग्रेस भरपर्दो र पुरानो लोकतान्त्रिक शक्ति भएको दाबी गर्दै २०६४ सालको जस्तो आवेगमा विवेक गुमाउने गल्ती नदोहोर्याउन मतदातालाई शर्माले आग्रह गरेका छन् । विदेशमा रहेका नेपाली समुदायलाई पार्टीसँग जोड्नका लागि विशेष पहल गरिने तथा गैरआवासीय नेपालीलाई मतदान अधिकार सुनिश्चित गर्न पहल गरिने उपसभापति शर्माले बताएका छन् । त्यसैगरी निर्वाचन पर्यवेक्षण सम्बन्धी संस्थाहरूले प्रतिनिधि सभा निर्वाचनमा आचारसंहिता उल्लंघनका घटना अत्याधिक भएको निष्कर्ष निकालेका छन् । आम निर्वाचन पर्यवेक्षण समिति (जिओक) र निर्वाचन पर्यवेक्षण समिति (इओक) नेपालले पत्रकार सम्मेलन गरी निर्वाचन आयोगले तयारीमा प्रभावकारी काम गरे पनि आचारसंहिता कार्यान्वयनमा कमजोरी देखिएको आरोप लगाएका हुन् । प्रतिवेदन अनुसार यसपटक डिजिटल माध्यमबाट हुने उल्लंघनका घटना उल्लेख्य रूपमा बढेका छन् । सामाजिक सञ्जालमा घृणा र द्वेषपूर्ण अभिव्यक्ति, अमर्यादित पोस्ट, गालीगलौज तथा मिथ्या र भ्रामक सूचनाको प्रवाह तीव्र भएको जनाइएको छ । राजनीतिक दल, उम्मेदवार, कार्यकर्ता, पत्रकार, कलाकार तथा सामाजिक अभियन्ताबाट समेत आचारसंहिता उल्लंघन भएको भन्दै आयोगले समयमै प्रभावकारी निगरानी र नियमन गर्न नसकेको दाबी गरिएको छ ।
