काठमाडौं । राष्ट्रपति रामचन्द्र पौडेलले वैशाख २८ गते दिउँसो २ बजेलाई संघीय संसद्को अधिवेशन आह्वान गरेका छन् । मन्त्रिपरिषद्को सिफारिसमा राष्ट्रपतिले दुवै सदनको अधिवेशन आह्वान गरेको राष्ट्रपतिको कार्यालयले जनाएको छ । यसअघि वैशाख १७ गतेलाई आह्वान भएको संसद् अधिवेशन सरकारकै सिफारिसमा राष्ट्रपतिले स्थगित गरेका थिए । त्यसैगरी जिल्ला अदालत काठमाडौँले व्यवसायी शेखर गोल्छालाई अनुसन्धानका लागि हिरासतमा राख्न अनुमति नदिने आदेश गरेको छ । न्यायाधीश मोना सिंहको इजलासले गोल्छालाई हिरासतमा राखी अनुसन्धान गर्न म्याद थप गर्न नमिल्ने आदेश गरेको हो । अदालतको आदेशसँगै व्यवसायी गोल्छा थुनामुक्त हुनेछन् । आदेशमा भनिएको छ, “प्रतिवादी शेखर गोल्छालाई हिरासतमै राखी मुद्दाको अनुसन्धान गर्नुपर्नेसम्मको अवस्थाको विद्यमानता रहेको नदेखिएकाले मुलुकी फौजदारी कार्यविधि संहिता, २०७४ को दफा १४(३) बमोजिम प्रतिवादीलाई हिरासतमा राखी अनुसन्धान गर्न म्याद थप गर्न मिलेन ।” व्यवसायी गोल्छालाई धितोपत्र र बिमासम्बन्धी कसुरमा अनुसन्धानका लागि प्रहरीले यही वैशाख १४ गते पक्राउ गरेको थियो । त्यसैगरी पार्टीको आन्तरिक विवाद समाधान भएसँगै नेपाली कांग्रेसका शीर्ष नेताहरूबीच राजनीतिक सक्रियता बढ्न थालेको छ । सभापति गगनकुमार थापा र नेता डा.शेखर कोइरालाबीच लामो समयपछि औपचारिक भेटवार्ता भएको छ । दुई नेताबीच विशालनगरमा रहेको कोइरालाको सचिवालयमा करिब ४५ मिनेट भेटवार्ता भएको हो । भेटमा पार्टीको आगामी रणनीति, संगठन सुदृढीकरण तथा कार्यदिशाबारे छलफल भएको सभापति थापाको सचिवालयले जनाएको छ । नेताहरूबीच आपसी सहकार्यलाई प्राथमिकता दिने र पार्टीलाई एकताबद्ध बनाएर अघि बढ्ने विषयमा कुराकानी भएको थियो । अदालतले पार्टीको आधिकारिकता दिएपछि सभापति थापाले शीर्ष नेताहरूसँग चरणबद्ध छलफल गर्दै आएका छन् । उनले पार्टीभित्र सहमति र सहकार्यको वातावरण बनाउने प्रयास गरिरहेका छन् ।
