काठमाडौँ । प्रधानन्यायाधीशमा डा. मनोजकुमार शर्माको नाम अनुमोदन भएको छ । संसदीय सुनुवाइ समितिको बैठकले उनको नाम अनुमोदन गरेको हो । अनुमोदन भएपछि अब उनको नाम राष्ट्रपति समक्ष सिफारिस हुनेछ । मंगलबार बिहानबाट बसेको समितिको बैठकले एकैदिन १६ वटा उजुरीमाथि छलफल, उजुरीकर्तासँग छलफल र प्रस्तावित प्रधानन्यायाधीशमाथि पनि छलफल गरेको थियो । वैशाख २४ गते बसेको संवैधानिक परिषद्को बैठकले शर्मालाई प्रधानन्यायाधीशका लागि सिफारिस गर्ने निर्णय गरेको थियो । यसैबीच मंगलबार बसेको मन्त्रिपरिषद्को बैठकले विभिन्न सात निर्णय गरेको छ । सरकारका प्रवक्ता रहेका शिक्षामन्त्री सस्मित पोखरेलले निर्णयहरू सार्वजनिक गरेका छन् । मन्त्रिपरिषद् बैठकले गरेको निर्णयमा १. नगरपालिका राजस्व अभिवृद्धि परियोजनाको लागि स्विट्जरल्यान्ड सरकारबाट प्राप्त हुने ६.११६ मिलियन स्विस फ्यांक अनुदान स्वीकार गर्ने । २. अरनिको राजमार्गको मर्मत सुधार गर्न चीन सरकारले प्रदान गर्ने ७९.३६ मिलियन आरएमबी अनुदान स्वीकार गर्ने । ३. क) काठमाडौं उपत्यकाका नदीकिनारमा रहेका जोखिमयुक्त बस्ती हटाउँदा विस्थापित हुने व्यक्तिहरूको विवरण रुजु गरी प्रतिपरिवार पुनर्स्थापना खर्चबापत रु. २५००० एकमुस्ट रूपमा प्रदान गर्ने । (ख) जोखिमयुक्त बस्तीबाट हटाइएकाहरूलाई वैकल्पिक बसोबासको व्यवस्था आफैँ गर्न प्रोत्साहित गर्न पाँच सदस्य भएको प्रतिपरिवार राहत रकम रु. १५००० प्रतिमहिनाको र सोभन्दा बढी सदस्यका लागि प्रतिसदस्य थप रु. २००० प्रतिमहिनाको दरले, हाललाई तीन महिनाका लागि बसोबास व्यवस्थापन खर्च प्रदान गर्ने । (ग) वृद्ध, अशक्त, असहाय तथा आफ्नो व्यवस्थापन गर्न नसक्ने व्यक्ति तथा परिवारलाई तोकिएको होल्डिङ सेन्टरहरूमा राख्ने । (घ) बालबालिका तथा विद्यार्थीको पठनपाठन तथा विद्यालयको सुनिश्चितता र स्वास्थ्य सेवा सुविधाहरूको सुनिश्चितता स्थानीय तहसँगको समन्वय तथा सहकार्यमा गर्ने । ४. प्रत्यायान नियमावली, २०८३ स्वीकृत गर्ने । ५. सैनिक सेवा (छैटौँ संशोधन) नियमावली, २०८३ स्वीकृत गर्ने । ६. नेपाल राष्ट्र बैंक, २०५८ लाई संशोधन गर्न बनेको विधेयक संघीय संसदमा पेस गर्न स्वीकृति दिने । ७. नेपाल सरकार (कार्य विभाजन) नियमावली, २०८३ अनुसार हुने गरी राजपत्रांकित विशिष्ट श्रेणीका सचिवको दरबन्दी मिलान गर्ने र पदस्थापन गर्ने रहेका छन् । त्यसैगरी पूर्वमन्त्री सुधन गुरुङले देश लुट्ने र मुलुकलाई बर्बाद बनाउनेहरूको सम्पत्ति छानबिन गरिनुपर्ने बताएका छन् । उनले वर्षौँदेखि सत्तामा बसेर अकुत सम्पत्ति आर्जन गर्नेहरूको स्रोत खोजी गर्नुपर्नेमा जोड दिएका हुन् । सञ्चारकर्मीहरूसँग कुरा गर्दै गुरुङले सर्वसाधारण र श्रम गरेर जीविकोपार्जन गर्नेहरूलाई भन्दा पनि देशलाई खोक्रो बनाउनेहरूलाई प्रश्न गरिनुपर्ने बताएका छन् । आफूहरूको सन्दर्भमा कुरा गर्दै उनले सानैदेखि पसिना बगाएर र दुःख गरेर नै अहिलेको अवस्थामा आइपुगेको दाबी गरेका छन् । मुलुकको आर्थिक र राजनीतिक अवस्थाप्रति चिन्ता व्यक्त गर्दै उनले वास्तविक दोषीलाई उन्मुक्ति दिन नहुने धारणा राखेका छन् । उनले आफ्नो आर्जन पारदर्शी भएको र कसैको डर नमानी देश सेवामा लागेको बताएका छन् ।
