काठमाडौं । उद्योग, वाणिज्य तथा आपूर्ति मन्त्री गौरीकुमारी यादवले नेपाल आयल निगमको निरीक्षण तथा अनुगमन गरेकी छन् । निगमको समग्र अवस्था र सेवा प्रवाहको प्रभावकारिता बुझ्न मन्त्री यादव बुधबार निगमको केन्द्रीय कार्यालय पुगेकी हुन् । निरीक्षणका क्रममा मन्त्री यादवले निगमको वर्तमान इन्धन आपूर्ति अवस्था, भण्डारण क्षमता र सञ्चालन व्यवस्थापनबारे जानकारी लिइन् । उनले उपभोक्तालाई सहज रूपमा इन्धन उपलब्ध गराउन र भण्डारण क्षमता विस्तारका योजनालाई प्राथमिकता दिन निर्देशन दिइन् । सो अवसरमा मन्त्री यादवले निगमका उच्च पदाधिकारीहरूसँग छलफल गर्दै सेवा प्रवाहलाई थप प्रभावकारी र प्रविधिमैत्री बनाउनुपर्नेमा जोड दिइन् । छलफलका क्रममा निगमको वर्तमान अवस्था, चुनौती र आगामी कार्ययोजनाबारे पदाधिकारीहरूले मन्त्रीलाई ब्रिफिङ गरेका थिए । यसैबीच राष्ट्रिय स्वतन्त्र पार्टी (रास्वपा)का सभापति रवि लामिछाने र भारतीय प्रधानमन्त्री नरेन्द्र मोदीबीच भेटवार्ता भएको छ । “राष्ट्रिय स्वतन्त्र पार्टीका अध्यक्ष रवि लामिछानेलाई भेटेर खुसी लाग्यो । साझा र समृद्ध भविष्यको लागि सँगै मिलेर काम गर्ने उहाँको इच्छालाई म स्वागत गर्दछु,” भेटवार्तापछि भारतीय प्रधानमन्त्री मोदीले सामाजिक सञ्जाल एक्समा लेखेका छन् । भारतीय प्रधानमन्त्रीले नेपालको नयाँ सरकारसँग भारत सहकार्य गर्न तयार रहेको बताएका छन् । “हाम्रो ‘छिमेकी पहिलो’ नीतिअन्तर्गत नेपाल एक प्राथमिकतामा रहेको साझेदार हो र हामी हाम्रा दुई देशबीचको विशेष र बहुआयामिक सम्बन्धलाई अझ उचाइमा पुर्याउन नयाँ सरकारसँग सहकार्य गर्न तत्पर छौँ,” भारतीय प्रधानमन्त्री मोदीले भनेका छन् । त्यसैगरी एमाले उपमहासचिव योगेश भट्टराईले पद नछाड्ने अध्यक्ष केपी शर्मा ओलीको भनाइप्रति कटाक्ष गरेका छन् । संकटका वेला नेतृत्वले झोला फालेर हिँड्न नहुने भन्दै पद नछाड्ने सन्देश दिएका अध्यक्ष ओलीलाई उपमहासचिव भट्टराईले सामाजिक संजालमार्फत कटाक्ष गरेका हुन् । ओलीले पार्टीको संगठन विभागले आयोजना गरेको राष्ट्रिय कार्यशालामा संकटका वेला महाधिवेशनबाट चुनिएको नेतृत्वले जिम्मेवारीबाट भाग्न नमिल्ने बताएका थिए । ०५९ सालमा जनकपुरमा सम्पन्न सातौँ महाधिवेशनमा तत्कालीन महासचिव माधवकुमार नेपालले नेतृत्वमा दोहोरिने इच्छा व्यक्त गरेपछि नेता ओलीले एउटा रोचक कथासहित गरेको व्यंग्य सामाजिक संजालमा पोस्ट गर्दै भट्टराईले कटाक्ष गरेका हुन् । यद्यपि, भट्टराईले त्यति वेला ओलीले नेपाललाई गरेको व्यंग्यको सन्दर्भ भने उल्लेख गरेका छैनन् ।
